सार्वजनिक उपक्रम मन म स्थानीय युवामन ल भर्ती करे बर मुख्यमंत्री के जोर
रायपुर। मुख्यमंत्री श्री भूपेश बघेल हा बेमेतरा जिला के ग्राम बावामोहतरा पहुंचके छत्तीसगढ़ डड़सेना (सिन्हा) कलार समाज के महासभा म शिरकत करिन। एक मौका म ओमन किहिन कि राज्य गठन के 18 साल बाद पहिली बार छत्तीसगढ़ के पारम्परिक तीज-तिहार म अवकास घोसित करे गे हे। एमा हरेली, तीजा, अउ माता कर्मा जंयती के अलावा विश्व आदिवासी दिवस ( 9 अगस्त) सामिल हे।
मुख्यमंत्री हा प्रदेस के सार्वजनिक उपक्रम मन म स्थानीय युवा मन के भर्ती करे जाय बर जोर दीन। ओमन एकर बर स्टील अथॉरिटी ऑफ इंडिया लिमिटेड (सेल), राष्ट्रीय खनिज विकास निगम (एन.एम.डी.सी), राष्ट्रीय ताप विद्युत निगम (एन.टी.पी.सी) के अध्यक्ष मन ले भर्ती के कार्यवाही हैदराबाद, नागपुर, भोपाल के बजाए दन्तेवाड़ा, जगदलपुर, रायपुर अउ दुर्ग ले करने के वकालत करिन। ओमन किहिन कि एन.टी.पी.सी. के अंतर्गत रायगढ़ जिला के ग्राम लारा म स्थापित होवइया राष्ट्रीय ताप विद्युत गृह म जेन किसान मन के जमीन अधिग्रहित करे गे हे ओ परिवार मन ल सबले पहली नौकरी दिए जाना चाही।
मुख्यमंत्री हा ये अवसर म जिला के 20 करोड़ 34 लाख रूपए के विभिन्न निर्माण कार्य मन के लोकार्पण अउ भूमिपूजन करिन। एकर अलावा हितग्राही मूलक योजना के अंतर्गत नागरिक मन ल 2 करोड़ 21 लाख रूपया के सामग्री के वितरण घलो करिन। मुख्यमंत्री हा नगर पालिका परिषद बेमेतरा म विकास कार्य मन बर एक करोड़ रूपया अउ जिला के सबो नगर पंचायत- साजा, थानखम्हरिया, परपोड़ी, देवकर, नवागढ़, बेरला अउ मारो म 50-50 लाख रूपया दिये जाए के घोसणा करिन। ओमन हा ग्राम बावामोहतरा म डड़सेना समाज के भवन निर्माण बर घोसणा करिन। यहू किहिन कि आगामी फरवरी महीना म बजट म मिनी स्टेडियम निर्माण के कार्य ल सामिल करे जाही।
मुख्यमंत्री हा समाज के विकास बर सिक्षा विसेस करके बालिका सिक्षा म जोर दीन। श्री बघेल हा किहिन कि राजभाखा छत्तीसगढ़ी के साथ-साथ हलबी, गोड़ी, कुड़ूख, सरगुजिहा बोली म भी पढ़ई होवय, ये दिसा म फैसला कर गे हे। राज्य म स्वास्थ्य के क्षेत्र म कुपोषण दूर करे के आवश्यकता हे। मुख्यमंत्री हा लोगन मन ले आह्वान करिन कि ग्रामीण अर्थव्यवस्था ल मजबूत करे बर छत्तीसगढ़ के चार चिन्हारी-नरवा, गरूवा, घुरूवा अउ बाड़ी के संरक्षण अउ संवर्धन खातिर आघू आवंय। एकर ले भूमिगत जल रिचार्ज होही, कम्पोस्ट खाद ले कृषि लागत कम होगी अउ जमीन के उर्वरा सक्ति बने रही।
गृह मंत्री श्री ताम्रध्वज साहू हा किहिन कि गुरु ऋण, मातृ पितृ ऋण के जइसे ही समाज के ऋण माने गे हे। सामाजिक सम्मेलन के जरिये सामाजिक एकता अउ भाईचारा बने राहय, जेकर ले समाज मजबूत होवय, यह बहुत जरूरी हे। महिला अउ बाल विकास अउ समाज कल्याण मंत्री अउ बेमेतरा जिला के प्रभारी मंत्री श्रीमती भेड़िया हा किहिन कि बेमेतरा जिला के विकास बर मैं हमेसा तत्पर रहूं।
कार्यक्रम म विधायक श्रीमती संगीता सिन्हा, विधायक बेमेतरा आशीष कुमार छाबड़ा, नवागढ़ विधायक श्री गुरूदयाल सिंह बंजारे, जिला पंचायत अध्यक्ष श्रीमती कविता साहू अउ समाज के प्रतिनिधि समेत बड़ी संख्या म गणमान्य नागरिक उपस्थित रिहिन। इस अवसर म समाज के प्रांतीय अध्यक्ष दीपक कुमार सिन्हा, संरक्षक भोजराम डड़सेना घलो हा अपन विचार व्यक्त करिन। इस मौका म कलेक्टर महादेव कावरे, पुलिस अधीक्षक प्रशांत ठाकुर, जिला पंचायत सीईओ प्रकाश कुमार सर्वे घलो उपस्थित रिहिन।
