छत्तीसगढ़ के प्रवेश द्वार म प्रवासी श्रमिक मन के हाल जाने बर पहुंचिस कलेक्टर

जय जोहार…. कलेक्टर ह कवर्धा जिला के आखिरी छोर म चिल्फी अऊ धवईपानी चेक पोस्ट के निरीक्षण करिन। ए दौरान कलेक्टर ह ऊहां पहिले ले आन राज्य ले आय प्रवासी श्रमिक मन ले मुलाकात करिन अऊ हाल-चाल ल जानिस। ए मऊका म कलेक्टर ह अधीनस्थ अधिकारी मन ले कबीरधाम जिला के श्रमिक ल गांव अऊ दूसर जिला के श्रमिक मन ल जिला के सीमा तक बस ले पहुंचाये ल कहिस।

कवर्धा-जबलपुर मुख्य रद्दा के जिला के आखिरी सीमा अऊ राज्य के प्रवेश द्वार धवईपानी म कोरोना वायरस के संक्रमण के बचाव बर संचालित बैरियर के कलेक्टर अवनीश कुमार शरण ह सन्निचर के निरीक्षण करिन। कलेक्टर ह स्वास्थ्य विभाग के टीम के तरफ ले दे जावत श्रमिक अऊ आन व्यक्ति मन के स्वास्थ्य परीक्षण के जायजा लिस।