लईका मड़ई म बघेल ह पारंपरिक खेल मन ल प्रोत्साहित करिन

रायपुर, मुख्यमंत्री भूपेश बघेल ह राजधानी स्थित बलबीर सिंह जुनेजा इंनडोर स्टेडियम म आयोजित तीन दिवसीय ‘लईका मड़ई‘ के समापन कार्यक्रम म सामिल होइन। मुख्यमंत्री श्री बघेल ह ए अवसर म स्कूली लइका मन के संग भुइंया म बइठके छत्तीसगढ़ के परम्परागत खेल गोटा खेल के उत्साहवर्धन करिन। एखरे संग उमन इहां के पाम्परिक खेल भौंरा चलाके ओला अपन हथेरी म नचाइस।

मुख्यमंत्री ह कहिन कि राज्य के हर गांव म कई ठन विधा मन म प्रतिभावान अउ हुनरमंद लइका हें। अइसन आयोजन मन ले उंखर लुकाय प्रतिभा ल उभारे अऊ निखारे के मउका मिलथे। हमर परम्परा, संस्कृति, शिक्षा, खेल के सौंधी महक के संग विद्यार्थी के व्यक्तित्व के पूरा विकास करे बर लईका मड़ई एक ससक्त माध्यम हे। मुख्यमंत्री ह रायपुर नगर निगम ल स्वच्छता ल अऊ जादा बढ़ाए बर 25 करोड़ रूपिया देहे के घोषणा करिन।

कार्यक्रम ल नगरीय प्रशासन अउ श्रम मंत्री डॉ. शिवकुमार डहरिया ह घलोक संबोधित करिन। उमन कहिन के मड़ई मेला हमर प्राचीन संस्कृति ये। छत्तीसगढ़ म धान कटाई के बाद फसल घर के कोठी म धन आये के खुशी म ग्रामीन अंचल मन म अइसन मड़ई मेला के आयोजन करे जाथे। अइसने स्कूल अउ महाविद्यालय मन म लईका मड़ई के आयोजन करे जवत हे। ए अवसर म नगर पालिक निगम के महापौर  प्रमोद दुबे, रायपुर नगर दक्षिण के विधायक बृजमोहन अग्रवाल, पूर्व महापौर किरणमयी नायक, पूर्व सदस्य राज्य साक्षरता मिशस प्राधिकरन डॉ. चौलेश्वर चंद्राकर उपस्थित रहिन।