खेत के मेढ़ बर दू किसान परिवार म झगड़ा, चलिस सब्बल अउ लाठी, चार गंभीर

बिलासपुर। तखतपुर के खटोलिया गांव म खेत के मेढ़ ल लेके दू किसान परिवार म विवाद होईस फेर ये  विवाद अतेक बढ़ गे कि मामला खूनखराबा म बदल गे। जेकर ले 4 लोग गंभीर रूप ले घायल हो गे। सबो झन ल ईलाज बर बिलासपुर सिम्स अस्पताल म भरती कराए गे हे। पुलिस ह मामला के जांच म जुट गे हे।

बतात हे कि तखतपुर जूनापारा चौकी के खटोलिया गांव म रहईया किसान विष्णु कश्यप अपन परिवार के संग खेत म काम करत रिहिस, इही बीच गांव के ही अश्वनी कश्यप ह अपन बेटा अउ भाई के संग लाठी, साबर लेके पहुंच गे अउ खेत के मेढ़ बर विवाद करत विष्णु कश्यप के उपर ताबड़तोड़ हमला कर दिस। ये हमला म विष्णु के  परिवार के 4 झन ल गंभीर चोट आईस हे, जेला तत्काल तखतपुर स्वास्थ्य केंद्र म भरती करवाए गिस, जिहां गंभीर हालत ल देखत वो मन ल बिलासपुर के सिम्स अस्पताल भेज गिन हे। सिम्स प्रभारी एमएस आरती पांडेय ह बतईन हे कि वोखर मन के हालत ह स्थिर हे।