भारत म कोरोना संक्रमित मन के संख्या ह 1.45 लाख ले जियादा, 24 घंटा म आय हे 6535 नवा मामले

जय जोहार…. भारत म कोरोना संक्रमित मरीज मन के संख्या ह सरलघा बाढ़त हे। पिछिले 24 घंटा म कोरोना के 6535 नवा मामले आय हे। जबकि 146 लोगन मन के जान चले गे हे। भारत म अभी 80 हजार ले जियादा सक्रिय मामले हे। महाराष्ट्र म कुल संक्रमित मन के संख्या ह 52667 हो गे हे। जेमा ले 1695 लोगन मन के मौत हो चुके हे। भारत म कोरोना संक्रमित मरीज मन के आंकड़ा ह एक लाख 45 हजार ले जियादा हो गे हे।

स्वास्थ्य मंत्रालय के तरफ ले मंगलवार बिहनिया जारी अपडेट के अनुसार देश म अब कुल मरीज मन के संख्या ह 1 लाख 45380 हे। जेमा ले 4167 लोगन मन के मौत हो चुके हे। ऊहचे 60 हजार ले जियादा लोगन मन ह स्वस्थ हो चुके हे। तमिलनाडु म कोरोना मामले के संख्या ह 17 हजार ले जियादा हे। इहां 118 लोगन मन के जान चले गे हे। गुजरात म कुल संक्रमित मरीज मन के संख्या ह 14460 हो गे हे, जेमा ले 888 लोगन मन के मौत हो गे हे। दिल्ली म घलो कोरोना मरीज मन के आंकड़ा ह 14 हजार ले अधिक पहुंच गे हे। इहां 276 लोगन के जान चले गे हे।