पूर्व सीएम रमन सिंह के दामाद पुनीत गुप्ता के ठिकाना म छापेमारी

रायपुर. छत्तीसगढ़ के पूर्व मुख्यमंत्री डॉ. रमन सिंह के दामाद डॉ. पुनीत गुप्ता की मुश्किल मन बढ़े लगिस हे. डीकेएस अस्पताल म करोड़ों रुपिया के फर्जीवाड़ा के आरोपी डॉ. पुनीत गुप्ता के रायपुर के राजेन्द्र नगर स्थित ठिकाना पर पुलिस ह छापेमारी हे. इहां उंखर निवास ले लगे डॉ. पुनीत गुप्ता के पिता डॉ. जीबी गुप्ता द्नारा संचालित जीबीजी कि़डनी अस्पताल घलो हे. पुलिस  ह इहां दस्तावेज मन के  जांच करिस.

बता देवन के, डॉ. पुनीत गुप्ता के खेलाफ लगभग 50 करोड़ रुपिया  के फर्जीवाड़ा ल लेके एफआईआर दर्ज होइस हे. ये एफआईआर डीकेएस अस्पताल के अधीक्षक केके सहारे के सिकायत म रायपुर के गोल बाजार पुलिस थाना म दर्ज होइस हे. डीकेएस अस्पताल म मसीन खरीदी अउ भर्ती म अनियमितता के सिकायत के बाद तीन सदस्यीय एक कमेटी ह मामला के जांच करे रिहिस हे. एमा डीकेएस अस्पताल के तत्कालीन अधीक्षक डॉ. पुनीत गुप्ता के खेलाफ लगभग 50 करोड़ रुपिया  के फर्जीवाड़ा के बात आघू आइस हे.

इसी मामला म बीते बुधवार के गोल बाजार थाना म अपना बयान दर्ज कराए बर नोटिस जारी करेगे रिहिस हे, लेकिन उमन नइ पहुंचिन. एखर बाद उंखर वकील ह पुलिस ल आवेदन देय हे के उमन बीमार हे अउ पेस होए बर 20 दिन के समय देय जाए, लेकिन पुलिस  ह उंखर आवेदनल खारिज कर दिस अउ तीन दिन के भीतर उपस्थित होए बर कहे रिहिस. एखर बाद आज पुलिस ह उंखर पिता के अस्पताल म दबिश दीस हे.