कोरोना ले जंग म भाजपा के पहल… जरूरतमंद मन के पेट भरत हे दीनदयाल रसोई

जय जोहार रायपुर…. भाजपा के तरफ ले राजधानी रायपुर म लॉक डाउन म जरूरतमंद मन के सहयोग बर हेल्प डेस्क चलाय जात हे। लॉक डाउन के दौरान राजधानी के बहुत ले गरीब परिवार ह जेन रोज कमा के अपन जीविकापार्जन करत रहिस। आज वो मन ह संकट म आ गे हे। अईसे गरीब परिवार मन के सहायता बर भाजपा के तरफ ले 6 अप्रैल स्थापना दिवस ले दीनदयाल रसोई प्रारंभ करे गे हे। ए रसोई म भाजपा कार्यकर्ता मन ह आपस म सहयोग ले प्रतिदिन 2000 पैकेट भोजन पका के जरूरतमंद गरीब परिवार मन बर दोपहर अऊ रात के खाना के व्यवस्था करे जात हे।

भाजपा के दीनदयाल रसोई के तरफ ले करे जात सेवा के निरीक्षण सांसद सुनील सोनी, भाजपा प्रवक्ता संजय श्रीवास्तव अऊ भाजपा प्रदेश कार्यसमिति सदस्य अंजय शुक्ला ह करिन। वो मन ह सेवा म लगे कार्यकर्ता के ए विपदा के समय म करे जात सेवा के सराहना करिन। सांसद सुनील सोनी ह कार्यकर्ता मन के उत्साह ल बढ़ाए बर फोन म पूर्व मुख्यमंत्री रमन सिंह ले बात करवाइस। पूर्व मुख्यमंत्री डॉ. रमन सिंह ह कार्यकर्ता मन ल ए सेवा कार्य ल तब तक करत रहे के अपील करिन, जब तक ए संकट टल न जाए। सांसद सुनील सोनी, भाजपा प्रवक्ता संजय श्रीवास्तव अऊ भाजपा प्रदेश कार्यसमिति सदस्य अंजय शुक्ला ह घलो कार्यकर्ता मन के संग भोजन पैक कर श्रमदान करिन।

दीनदयाल रसोई के माध्यम ले पंडरी किन्नर बस्ती, एक हास्पिटल, गांधी नगर, दुर्गा नगर, सड्‌डू हाउसिंग बोर्ड, डब्ल्यूआरएस कालोनी, फाफाडीह भाटापारा, फोकटपारा, भावना नगर राजातालाब समेत अलग-अलग हास्पिटल अऊ शहर के अन्य स्थान म जरूरतमंद तक भोजन के पैकेट ल पहुंचाए जात हे।