अमित, सियाराम अउ आरके के सदस्यता म लटकीस तलवार

रायपुर। अमित जोगी, सियाराम कौशिक अउ आरके राय के विधानसभा के सदस्यता खत्म करे के मांग नेता प्रतिपक्ष टीएस सिंहदेव ह करिस हे। उमन ह विधानसभा अध्यक्छ गौरीशंकर अग्रवाल ले लिखित म सिकायत करत हुए कहिन के अमित जोगी, सियाराम कौशिक अउ आरके राय के गतिविधि पार्टी विरोधी हे येखर सेती इंखर सदस्यता खत्म करे जाय।
कांग्रेस ले निलंबित विधायक सियाराम कौशिक, आर के राय अउ कांग्रेस ले निस्कासित विधायक अमित जोगी के खेलाफ सिकायती पत्र में सिंहदेव ह दूसर दल के कार्यकारिनी के बइठक म सामिल होय के हवाला देय हे । अउ तीन विधायक ल दल बदल कानून के दायरा म लाय के मांग करिन हे।
गउरतलब हे के राज्यसभा चुनाव के दउरान व्हिप के उल्लंघन करे के बाद कांग्रेस ह तीन झन के खेलाफ सिकायत करे के बात कहे रिहिन हे, लेकिन कांग्रेस ह वो दउरान कोनो सिकायत नइ करिन। दस्तावेजी प्रमान जुटाय के बाद कांग्रेस ह विधानसभा अध्यक्छ ले येकर सिकायत करिस हे। अब ये मामला म अंतिम फइसला विधानसभा अध्यक्छ ल करना हे।