सूरजपुर म स्वास्थ्य व्यवस्था ल लेके उठत हे सवाल

सूरजपुर । जिला के स्वास्थ्य व्यवस्था उपर आय दिन सवाल खड़ा होवत हे. जिहां जिला के ग्रामीन अंचल मन म कभु मलेरिया त कभु डायरिया जइसे बीमारी ह भयानक रुप म आघू आवत रहिथे अउ स्वास्थ्य विभाग के लापरवाही उजागर होवत रहिथे। ये बेर जिला अस्पताल म एक्सपायरी डेट के दवा वितरण कर के आरोप लगत हे।
बता दन कि सूरजपुर के अग्रसेन वार्ड निवासी काजल सारथी पीछु सप्ताह अपन लइका ल लेके इलाज बर जिला चिकित्सालय पहुंचे रिहिस हे। महिला के लइका ल भर्ती कर दवा के पर्ची दे गिस। परिजन मन के आरोप हे कि अस्पताल के काउंटर ले एक्सपायरी डेट के दवा दे गिस।
परिजन मन बताइन कि इलाज के बाद लइका ल अस्पताल ले डिस्चार्ज कर दे गिस। मामला तब आघू आइस जब पड़ोस के एक मनखे ह घर म एक्सपायरी डेट के दवा देखइस। पूरा मामला म बीएमओ आरएस सिंह के कहिना हे जांच के बाद फार्मासिस्ट ल नोटिस जारी करे जाही।