जेन विषय अउ कक्षा के परीक्षा परिणाम खराब होही, ओकर शिक्षक के ऊपर होही कार्रवाई
राजनांदगांव। कोनो भी विषय अउ कक्षा के परीक्षा परिणाम खराब होए म संबंधित शिक्षक के जिम्मेदारी तय करत उंकर विरूद्ध कड़ा कार्रवाई करे जाही। कलेक्टर श्री जयप्रकाश मौर्य हा ये निर्देश दिए हें।
कलेक्टर श्री मौर्य हा देश के आकांक्षी जिला म शामिल राजनांदगांव म नीति आयोग द्वारा निर्धारित बिन्दु के प्रगति के संबंध म 26 जुलाई के कलेक्टोरेट सभाकक्ष म आयोजित समीक्षा बैठक म जिला शिक्षा अधिकारी ला ए प्रकार ले निर्देश दिए हें।
बैठक म श्री मौर्य हा जिला म नीति आयोग द्वारा निर्धारित बिन्दु के प्रगति खातिर विभिन्न विभाग मन के द्वारा करे जावत कार्य मन के विस्तृत समीक्षा करिन। बैठक म जिला पंचायत के मुख्य कार्यपालन अधिकारी श्रीमती तनुजा सलाम, अपर कलेक्टर श्री एसएन मोटवानी समेत जम्मो विभाग मन के अधिकारी उपस्थित रिहिन।
बैठक म श्री मौर्य हा नीति आयोग द्वारा निर्धारित मापदण्ड के अनुसार शिक्षा विभाग के द्वारा करे जावत कार्य मन के विस्तृत समीक्षा करिन। ओमन किहिन कि शिक्षा गुणवत्ता म सुधार बहुत जरूरी हे। एकर बर सबो शिक्षक मन ला समय म विद्यालय म पहुंचके संपूर्ण शाला अवधि म अपने दायित्व के निष्ठा पूर्वक निर्वहन करना बहुत जरूरी है।
कलेक्टर हा बच्चा मन के परीक्षा म अनुत्तीर्ण हो जाय ले संबंधित शिक्षक अउ अपन कार्य म लापरवाही बरतने वाला शिक्षक मन के विरूद्ध कड़ा कार्रवाई करे बर कहिन। ओमन अइसन शिक्षक मन के विरूद्ध वेतन वृद्धि रोके के कार्रवाई अउ अपन कर्तव्य म आदतन लापरवाही बरतने वाला शिक्षक मन के विरूद्ध बर्खास्तगी के कार्रवाई करे के निर्देश जिला शिक्षा अधिकारी ला दीन।
ओमन जिला शिक्षा अधिकारी ला स्कूल मन के नियमित निरीक्षण करे बर अउ गणित, अंग्रेजी विषय के शिक्षक मन बर प्रशिक्षण कार्यक्रम आयोजित करे बर किहिन।
