chhattisgarh: सीएम भूपेश बघेल ह किसान मन ले करीन अपील, किहीन -1 जुलाई ले अपन गांव म सुरु करे रोका अउ छेका

जय जोहार…. (chhattisgarh) सीएम भूपेश बघेल ह प्रदेस के किसान मन ले अपील करे हे कि ओ हा 1 जुलाई ले अपन – अपन गांव म रोका अउ छेका अभियान ल सुरु करे। सीएम बघेल ह किहीन कि पशुपालक ह अपन पशु ल खुले म चराय बर छोड़े के बजाय ओ मन ल गोठान म भेजे, जिहां चारा अउ पानी के प्रबंध करे गे हे।

सीएम बघेल ह पशुपालक अउ किसान मन के नाव अपन संदेस म किहीन कि बरसा के दिन म पशु मन म गलघोटू अउ एकटंगिया के बीमारी होत हे। ऐखर ले बचाव बर अपन पशु ल टीका जरूर लगवाए। सीएम बघेल ह किहीन कि ए घांव हमर मन के प्रदेश म मानसून ह सही बेरा म आ गे हे। (chhattisgarh) प्रदेस म अच्छा बरसा हो चुके हे। किसान मन ह अपन खेत म फसल के तैयारी म लग गे हे।

प्रदेस के जलासय अउ तालाब म पानी उपलब्ध हे। किसान मन ल खाद अउ बीज के जरुरत के मुताबिक सहकारी समिति ले मिल सके, एखर बर हमन बिसेस धियान देत हन। सबो सोसायटी म रासायनिक उर्वरक अउ प्रमाणित बीज के भण्डारण ल सरलग करे जात हे।

(chhattisgarh ) सीएम बघेल ह किहीन कि ए घांव दलहनी अउ तिलहनी फसल म जादा जोर देत हन। ए फसल के उत्पादन बाढ़े ले किसान मन ल जादा लाभ मिलही। हमन ह दलहन-तिलहन, अरहर, सोयाबीन, मक्का, गन्ना, कोदा-कुटकी, सुगंधित धान के खेती ल प्रोत्साहित करे बर एला राजीव गांधी किसान न्याय योजना म सामिल कर ले हन। धान के संगेसंग आन प्रमुख खरीफ फसल के खेती करइया किसान मन ल घलो हरेक एकड़ के मान ले 9 हजार रुपिया के आदान सहायता देही ।