बाबा गुरू घासीदास ह समाज ल एक सूत्र म पिरोये के दे रहिन प्रेरना : भूपेश बघेल

सम्मान समारोह म सामिल होइन मुख्यमंत्री

रायपुर। मुख्यमंत्री भूपेश बघेल ह कहिन के बाबा गुरू घासीदास ह मानवता ल सत्य, अहिंसा, प्रेम अऊ भाईचारा के रद्दा देखाइन। उंखर सबले बड़े संदेश ‘मनखे-मनखे एक समान’ सबो समाज ल एक सूत्र म पिरोये के प्रेरना देथे। मुख्यमंत्री रविवार के भिलाई सेक्टर-6 म सतनामी समाज के शासकीय अधिकारी-कर्मचारी मंडल कोति ले आयोजित सम्मान समारोह ल मुख्य अतिथि के आसंदी ले सम्बोधित करत रहिन। कार्यक्रम म सतनामी समाज के अधिकारी-कर्मचारी मन ह मुख्यमंत्री श्री बघेल ल सामाजिक परम्परा के मुताबिक सफेद पागा पहिरा के स्वागत करिन। मुख्यमंत्री बघेल ह सतनाम भवन म गुरू गद्दी के पूजा-अर्चना करके प्रदेश के खुशहाली के कामना करिन।

मुख्यमंत्री ह कार्यक्रम ल सम्बोधित करत कहिन के राज्य सरकार बाबा गुरू घासीदास के बताए रद्दा म चलके सबो वर्ग के विकास बर प्रतिबद्ध हे। उमन कहिन के सरकार ह जऊन वादा जनता ले करे हे ओला अवश्य पूरा करही। कार्यक्रम म समाज के प्रतिनिधि मन ह मुख्यमंत्री ल मांग पत्र सौंपिन। मुख्यमंत्री ह उंखर मांग मन उपर सहानुभूतिपूर्वक विचार करे के आश्वासन दीन।

कार्यक्रम म गृहमंत्री ताम्रध्वज साहू, राज्यसभा सांसद छाया वर्मा, डोंगरगढ़ विधायक  भुवनेश्वर बघेल, मनेन्द्रगढ़ विधायक विनय जायसवाल, भिलाई नगर विधायक देवेन्द्र यादव, सतनामी अधिकारी कर्मचारी मण्डल के अध्यक्ष  एसआर मिर्चे संग अधिकारी-कर्मचारी संघ के बहुत अकन पदाधिकारी अऊ बड़ संख्या म सदस्य उपस्थित रहिन।