फिल्म सिटी के बजाय सरकार बेरोजगार मन ला सिनेमाघर खोले बर मदद करे – गिरधारी पांडे
दीपक बावनकर@रायपुर मोर छईया भुइयां अउ झन भूलो मां बाप ल म जबरदस्त रोल करैया , गिरधारी पांडे के नाम से प्रसिद्ध शहर के मनमोहन सिंह ठाकुर नवा रायपुर म फिल्म सिटी बनाए बर अभी पक्ष में नई हे ,ऊंखर कहना हे कि फिल्म सिटी बनाए म सरकार के करोड़ों रुपया खर्च होही अतना बजट के फिलिम ईहां नई बने कि वो मन फिल्म सिटी के किराया देके उहां शूटिंग कर पाए । मनमोहन ह किहिस कि में ह एक प्रतिनिधि मंडल के संग मुख्यमंत्री ले मिलके सुझाव देहूं कि ब्लॉक अउ तहसील स्तर म बेरोजगार मन ल सिनेमाघर खोले बर कम कीमत म जमीन अउ सब्सिडी मुहैया कराए।
अईसे में युवा बेरोजगार मन ल रोजगार मिलही अउ सरकार के राजस्व में वृद्धि होही उहींचे सिनेमाघर के कमी ले जुझत छालीवुड ल एक ताकत मिल पाहि। छत्तीसगढ़ म मनमोहन सिंह ठाकुर के प्रशंसक मन के भरमार हे। मनमोहन के कहना हे कि सरकार फिल्म सिटी बनाय बर कखरो केहे ले तत्परता न दिखाए बल्कि सोच विचार के निर्णय करे ताकि अईसे निर्णय सामने आए जेखर ले छालीवुड अउ युवा बेरोजगार मन के फायदा होए । अईसे करे ले सरकार के प्रति लोगन मन के अच्छा संदेश जाही।
