तो मैं ह जांच म आघू ले सहयोग नइ कर पाहूं: फिरोज सिद्दीकी

रायपुर। बहुचर्चित अंतागढ़ टेप कांड आघू लवइया अउ एखर मुख्य गवाह फिरोज सिद्दीकी के बड़का बयान आघू आइस हे. फिरोज सिद्दीकी ह कहिन के, 2 बार आवेदन दे के बावजूद पुलिस उमन ल सुरक्षा नइ देवत हे.

फिरोज ह मध्यप्रदेश के व्यापमं घोटले के जांच के दउरान होए गवाह मन के हत्या के हवाला देवत हुए कहिन, मोर जान ल खतरा हे, लेकिन पुलिस ए मामला म गंभीर नइए. चालान पेस नइ होए के बहाना करत हे, जबकि मैं एक भ्रष्टाचार के मामला आघू लाय हव. फिरोज ह कहिन, अगर पुलिस सुरक्षा नइ दीहि तो मैं जांच म आघू सहयोग न कर पाहूं.

बता देन के बरिस 2014 म अंतागढ़ के कांग्रेस प्रत्याशी मंतूराम पवार ह चुनाव के ठीक पहिली नाम वापस ले रहिस हे, जेखर कारन भाजपा प्रत्य़ाशी ल आसान जीत मिलिस. कुछु बेरा बाद फिरोज सिद्दीकी के एक आडियो वायरल होइस जेमा नाम वापसी बर मंतूराम ल पइसा मिले के आरोप लगिस.।

कांग्रेसी नेत्री किरणमयी नायक ह ए मामला म मंतूराम पवार, पूर्व सीएम अजीत जोगी, अमित जोगी, पूर्व मंत्री राजेश मूणत अउ पूर्व सीएम डॉ रमन सिंह के दामाद पुनीत के खेलाफ FIR दर्ज कराए रहिस हे. एखर बाद भूपेश सरकार ह ए मामला के जांच बर रायपुर SP के प्रभार म SIT के गठन करिस हे. मामला म फिरोज सिद्दीकी ल मुख्य गवाह बनाय गे हे.