chhattisgarh: मछुआ नीति ल केबिनेट के अवइया बइठक म दे जाही मंजूरी : भूपेश बघेल

जय जोहार। मुख्यमंत्री भूपेश बघेल ह किहीन कि प्रदेस के मछुआ नीति ल केबिनेट के अवइया बइठक म मंजूरी दे जाही। मछुआ नीति के प्रारूप ल तैयार कर ले गेहे । मुख्यमंत्री ह रविवार के राजधानी रईपुर के सरदार बलबीर सिंह जुनेजा इंडोर स्टेडियम म आयोजित छत्तीसगढ़ निषाद केंवट समाज के नवनिर्वाचित पदाधिकारी मन के सपथ ग्रहण समारोह म ये घोसना करीन ।

(chhattisgarh) मुख्यमंत्री ह किहीन कि समाज के मनखे मन के हित म राज्य सरकार डहार ले नीति बनाय जात हे, लेकिन एखर जादा से जादा मनखे मन ल लाभ दिलाय के दायित्व समाज के हे। वोहा किहीन कि छत्तीसगढ़ म मछलीपालन ल कृषि के दर्जा दे गेहे। ए नीति के तहत मछलीपालन करइया मनखे मन ल किसान के जइसे बिना ब्याज के ऋण अउ बिजली सुल्क म छूट दे जात हे

ए प्रावधान के लाभ उठाय बर समाज के मनखे मन ल जादा ले जादा संख्या म सामने आना चाही। वोहा संसदीय सचिव अउ निषाद केंवट समाज के नवनिर्वाचित अध्यक्ष कुंवर सिंह निषाद के आग्रह म निषाद केंवट समाज के भवन निर्माण बर एक करोड़ रुपिया के रासि ल स्वीकृति करे के घोसना करीन ।

कार्यक्रम म कृषि मंत्री श्री रविन्द्र चौबे, खाद्य मंत्री अमरजीत भगत, संसदीय सचिव कुंवर सिंह निषाद, शकुंतला साहू, छत्तीसगढ़ राज्य मछुआ कल्याण बोर्ड के अध्यक्ष एम.आर.निषाद, छत्तीसगढ़ खनिज विकास निगम के अध्यक्ष गिरीश देवांगन घलो उपस्थित रिहीन ।