15 साल के नाबालिग लड़की के जबरन करा दिस शादी, बेचे बर के पहिली पुलिस ह 7 आरोपी मन ल दबोचिस

जय जोहार बिलासपुर…. पुलिस ल एक बड़े सफलता हाथ लगिस। मानव तस्करी के मामला म पुलिस ह शहर के ऑटो चालक समेत 7 आरोपी मन ल गिरफ्तार करिस। आरोपी मन ह संरक्षण दे बर के नाम म जबरन 15 साल के नाबालिग लड़की के शादी करवा दिस। एखर बाद वो ला ग्वालियर म बेचे बर रहिस। जानकारी के अनुसार नाबालिग दूसर जिला के हे। वो हा घर ले भाग के बिलासपुर आए रहिस। ये दौरान नाबालिग के शादी करवा के बेचे बर रहिस। पुलिस ल भनक लगते ही आरोपी मन ल दबोच के मानव तस्कर मन ले छुड़ा लिस। पुलिस ह आरोपी मन ले एक ऑटो, मंगलसूत्र, सात हजार नगद समेत अन्य सामान ल जब्त करिस। पुलिस अब ये मामला म पूछताछ करत हे कि ये आरोपी मन के तार कोनो बड़े मानव तस्कर ले तो नई जुड़े हे।