राज्य युवा महोत्सव म शामिल होइन सुपर 30 के संस्थापक, छत्तीसगढ़ के युवा मन ल दिन सफलता के मंत्र

रायपुर। छत्तीसगढ़ राज्य युवा महोत्सव 2024-25 के दूसर दिन रायपुर के साइंस कॉलेज मैदान म सुपर 30 के संस्थापक आनंद कुमार ह युवा मन ले चर्चा के बेर छत्तीसगढ़ म युवा मन के शिक्षा अउ स्वर्णिम भविष्य के निर्माण बर शासन द्वारा संचालित विभिन्न योजना मन के प्रशंसा करिन। ओमन ह कहिन कि शिक्षा के क्षेत्र म छत्तीसगढ़ के भविष्य उज्ज्वल हे। ओमन ह छत्तीसगढ़ के युवा मन ल प्रेरित करे बर मुख्यमंत्री विष्णुदेव साय अउ पूर्व आईएएस अधिकारी अउ वर्तमान म छत्तीसगढ़ के वित्त मंत्री ओपी चौधरी के उदाहरण दिन।

आनंद कुमार ह कोंडागांव ले एक छात्र के प्रश्न के उत्तर देवत कहिन कि अपन लक्ष्य म ध्यान केंद्रित करत दृढ़ इच्छाशक्ति के संग अपन कर्तव्य के निर्वहन करना आवश्यक हे। ओमन ह कहिन कि सही मार्गदर्शन अउ मेहनत ले कोनो भी लक्ष्य ल प्राप्त करे जा सकथे। 

युवा महोत्सव म आनंद कुमार ह युवा मन ले करे गे संवाद म स्वामी विवेकानंद के विचार मन के जिक्र करत कहिन कि स्वामी जी कहत रीहिन कि युवा मन म अतना शक्ति हे कि ओ असंभव ल घलो संभव बना सकथे। दृढ़ इच्छाशक्ति अउ सकारात्मक सोच के संग कोनो भी व्यक्ति अपन लक्ष्य ल हासिल कर सकथे। प्रबल प्रयास, असीम धैर्य अउ लगातार मेहनत सफलता के कुंजी हे। ओमन ए घलो कहिन कि जीवन म सकारात्मक सोच बनाए रखव। यदि आपमन एक बार संकल्प कर लेव, त सफलता ले आपमन ल कोनो रोक नई सकय। ओमन सोशल मीडिया के महत्व अउ ओखर ले बचने के तरीका मन म घलो चर्चा करिन। अउ कहिन कि सोशल मीडिया युवा मन के समय ल बर्बाद कर सकत हे, लेकिन यदि एला सही दिशा म इस्तेमाल करे जाए त ए ज्ञान के महत्वपूर्ण साधन घलो बन सकत हे।