पीईटी अउ नीट परीक्षा मन बर निःशुल्क कोचिंग सुरू

नवनीत शुक्ला, मुंगेली. जिला प्रशासन के पहल म पीईटी अउ नीट(NEET) परीक्षा मन बर निःसुल्क विसेस कोचिंग कक्षा मन के संचालन 1 अप्रैल ले सासकीय उच्चतर माध्यमिक साला दाऊपारा मुंगेली म करे गिस. जिला कलेक्टर डॉ. सर्वेश्वर नरेंद्र भुरे ह बताइस के, ये कोचिंग कक्षा म जे विद्यार्थी ह 30 मार्च 2019 के कलेक्ट्रेट परिसर के सभाकक्ष म काउंसलिंग म उपस्थिति रिहिस उमन के चयन करे गेहे. पीईटी बर 139 अउ नीट (NEET) परीक्षा बर 64 विद्यार्थी मन के चयन कर कोचिंग देय जात हे.

सबो चयनित विद्यार्थी मन ल बिहनिया 8:00 बजे से शासकीय माध्यमिक शाला दाउपारा मुंगेली म कोचिंग दे जात हे. पीएमटीअउ देवइया छात्र मन के कोचिंग 2 अप्रैल ले सुरू हो गेहे. उहें दूरदराज ले आवइया विद्यार्थी मन बर शासकीय प्री मेट्रिक अनुसूचित जाति बालक छात्रावास पड़ाव चउक मुंगेली मे बालक मन के आवास अउ शासकीय पोस्ट मेट्रिक अनुसूचित जाति कन्या छात्रावास दाऊपारा मुंगेली म बालिका मन के आवास के बेवस्था करे गेहे. जिहां रुकइया विद्यार्थी मन बर भोजन के बेवस्था घलो जिला प्रसासन के ओर ले करे गिस.

अइसने पीईटी काउंसलिंग म भाग लेवइया विद्यार्थी मन बर कक्षा 5 अप्रैल के बाद सुरू हो ही. येखर सूचना अलग ले जिला शिक्षा अधिकारी कार्यालय ले जारी करे जाही. सबो प्राचार्य मन ल जिला शिक्षा अधिकारी मुंगेली ह काउंसिलिंग म उपस्थित होय विद्यार्थी मन ल कोचिंग कक्षाएं प्रारंभ होय के सूचना दे बर निरदेसित करे गे हे.