राजनांदगांव म अलग-अलग शहर के 4 जुआरी मन गिरफ्तार

जय जोहार रायपुर….पुलिस ह देर रात जुआ खेलत चार बड़े जुआरी मन ल गिरफ्तार करिस। एखर मन ले दो लाख 63 हजार रूपिया बरामद करिस। जुआ-सट्‌टा के खिलाफ पुलिस अभियान के तहत ये कार्रवाई ल करिस हे। ये कार्रवाई ह दुर्ग रेंज आईजी अऊ राजनांदगांव के एसपी के निर्देशन म होइस हे।

सूचना के आधार ले पुलिस ह राजनांदगांव के कोतवाली इलाका के चिखली खार म दबिश दिस, इहां अलग-अलग शहर के बड़े-बड़े लोग मन जुआ खेलत रहिस। कोतवाली के चिखली चौकी पुलिस ह राजनांदगांव के नरेंद्र यादव, धमतरी के धर्मेंद्र साहू, दुर्ग के नरेश जसवानी अऊ रायपुर के रवि कुमार ल गिरफ्तार करिस।

आरोपी मन के पास ले दो लाख 63 हजार रूपिया नगद बरामद करिस। सबो आरोपी मन के खिलाफ जुआ एक्ट के तहत कार्रवाई करे गे हे।