बीकानेर ले आके करीन डकैती , चलत ट्रेन म धरा गे , पुराना नौकर मेलाराम निकलिस मास्टर माइंड

जय जोहार रायपुर….राजधानी के देवेंद्रनगर इलाका के पंडरी स्थित क्षितिज अपार्टमेंट म होइस 50 लाख रूपिया के डकैती मामला म पुलिस ल बड़े सफलता मिलिस। रायपुर ले नागपुर होवत दिल्ली जावत पांच आरोपी मन ल पुलिस के टीम ह चलत ट्रेन ले गिरफ्तार करिस। ये डकैती के मास्टर माइड घर के पुराना कर्मचारी निकलिस। इही ह बीकानेर के प्रोफेशनल डकैत मन के संग मिलके वारदात ल अंजाम दिस हे। जेन ह फरार हे। आईटीएमएस के कैमरा म डकैत मन के पुलिस ल क्लू मिलिस। ये आधार म पुलिस ह गिरफ्तार करिस। पुलिस ह आरोपी मन ले 49 लाख 10 हजार रूपिया बरामद कर लिस।

मामला के खुलासा करत एसएसपी आरिफ शेख ह बताइस कि शुक्रवार सुबह प्रार्थी बजरंग शर्मा ले सूचना मिलिस कि ओखर घर ले करीब 50 लाख के लूट होए हे। आरोपी मन ल पता रहिस कि पैसा कहां रखे गे हे। ये घटना के बाद दो टीम बनाए गे रहिस। एक टीम ह पहिली ले बाहर रिहिस ,ओखर भी मदद ले गिस। आईटीएमएस के जरिए आरोपी मन के संबंध म क्लू मिलिस। घटना के बाद ले पांच आरोपी म ह नागपुर गिस अऊ उहां ले दिल्ली जावत रहिस। ट्रेन म टीम ह एक व्यक्ति के पहचान कर ले रहिस। पांचों एक साथ ट्रेन में रहिस, चलत ट्रेन के अंदर ये मन ला गिरफ्तार करे गिस। ये सबो दिल्ली म उतरतिस।

वो हा बताइन कि आरोपी मन के पास ले 49 लाख 10 हजार रूपिया बरामद होए हे। एक देशी कट्‌टा भी बरामद होइस। प्रार्थी के पास ले मास्टर माइंड मेलाराम ह दो साल पहिली काम छोड़ दे रहिस। वो ला पता रहिस कि पैसा कहां रहत हे। इही ह योजना बनाए रहिस। एखर बाद ले बाकी आरोपी मन ले संपर्क करिस। सबो सीरियल किलर हे अऊ मर्डर के मामाला म जेल जा चुके हे। सबो बिकानेर के रहवइया हे। एसएसपी ह बताइन कि पुलिस टीम ह मेलाराम ल जल्दी गिरफ्तार कर लेही। प्रार्थी घलो बीकानेर के रहवइया हे।

पुलिस के मुताबिक ट्रेन के दिल्ली पहुंचे बर के 30 किलोमीटर पहिली पुलिस ह आरोपी मन ल पकड़े बर के तैयारी म रहिस। दिल्ली म दूसर मामला के जांच करत पुलिस टीम ह चलत ट्रेन म डकैत मन ल पकड़िस। व्यापारी के इहां काम करत रहिस कर्मचारी मेलाराम ह डकैती के योजना ल बनाए रहिस। पुलिस ह मामला म आरोपी अशोक जाखड़, प्रेम जाट, जय किशन गोदारा, गणेश जाट अऊ भवर चौधरी ल गिरफ्तार करिस। ये वारदात के मास्टर माइंड मेलाराम फरार हे। जेखर पुलिस ह तलाश करत हे।