नई रूकत हाबय गणेश हाथी के आतंक ह, फेर ले लिस एक अउ युवक के जान

रायगढ़। हाईकोर्ट के आदेश के बाद जंजीर ले बांध के रखे रिहिस गणेश हाथी ल आजाद तो कर दे हे, फेर वो हाथी के आतंक ह जारी हे। ये गुस्सैल हाथी ह जिला म धरमजयगढ़ वनमंडल के छाल रेंज म एक बाइक सवार युवक ल पटक-पटक कर मार डारिस। ये हाथी ह धरमजयगढ़ वनमंडल म अब तक 7 लोगन के जान ले डारे हे।

बतात हंवय कि मृतक कपलेश्वर भुंइहर अपन संगवारी गुलाब भुइंहर के संग बाइक म कहीं जात रिहिस। तभे रस्ता म गणेश हाथी ह खड़े रिहिस, जेला देखके बाइक के नियंत्रण ह बिगड़ गे अउ वोमन ह गिर गे। गुलाब भुंइहर ह बाइक के पीछू म बैइठे रिहिस तेखर सती वो ह मौका ले भाग गे। बाइक चालक कपलेश्वर ह बाइक ल मोड़े के चक्कर म नई भाग सकिस, जेखर बाद हाथी ह युवक ल पटक-पटक के मार डारिस। घटना के बाद गांव वाले मन रातभर जागत रिहिस काबर कि इलाका म गुस्सैल हाथी गणेश के कारण सब दहशत म हे।

गौरतलब हे कि बीते 23 जुलाई के जंजीर ल तोड़ गणेश हाथी ह भाग गे रिहिस, जेला वन विभाग के टीम ह रेस्क्यू कर पकड़े रहीस। एखर दूसर दिन वो ह फेर जंजीर ल तोड़के भाग गे तेखर बाद ले वो ह लगातार औरानारा गांव अउ ओखर आसपास ही घूमत हे।