रायपुर। विकास यात्रा के पहिली दिन केंद्रीय गृहमंत्री राजनाथ सिंह ह शनिवार के छत्तीसगढ़ के मुख्यमंत्री डॉ रमन सिंह के विकास यात्रा ल दंतेवाड़ा म हरी झंडी दिखाइस हे। ये मउवका म उमन सीएम रमन के जमके तारीफ करिन। उमन कहिन कि ‘मैं ह खुद मुख्यमंत्री रहे हव। लेकिन अइसे मुख्यमंत्री कोनो जगा नइ देखे जे ह गरीब के ‘पनही’ के चिंता करत हे।
छत्तीसगढ़ी म ‘जय जोहार’ कहिके अपन भाषण के शुरुआत कइरया केंद्रीय गृहमंत्री राजनाथ ह कहिन कि ‘मोर नजर म ये माओवादी ह आदिवासी मन के सबले बड़े दुश्मन हे। उमन ह आदिवासी मन के तारीफ करत हुए कहिन कि मैं ह आदिवासी भाइ-बहिनी मन के तारीफ करुं हू जे मन दिलेरी ले मुख्यधारा ले जुड़े हे अउ विकास करत हे। हमार सरकार शिक्षा, चिकित्सा, बिजली-पानी, मोबाइल टॉवर सबके सुविधा देही।
बड़े माओवादी चाहत हे कि आदिवासी मन के लइका अशिक्षित रहय अउ उंखर सेवा करत रहय। उमन ह माओवादी मन उपर हमला बोलत हुए कहिन कि माओवादी मन के बड़े नेता तो अपन लइका मन ल बड़े-बड़े स्कूल-कॉलेज म पढ़ात हे, इहां तक की विदेश म पढ़े बर भेजत हे अउ चाहथे कि इहां आदिवासी मन के लइका अशिक्षित रहय। अउ उमन ल सुविधा झन मिलय।
–
