chhattisgarh म तीन दिन तक दिखही आदिवासी संस्कृति के झलक, राष्ट्रीय आदिवासी नृत्य महोत्सव के होही आयोजन

जय जोहार । छत्तीसगढ़ ( chhattisgarh) के राजधानी रायपुर म राष्ट्रीय आदिवासी नृत्य महोत्सव के भव्य आयोजन करे जाही । ये कार्यक्रम एक ले तीन नवम्बर तक साइंस कॉलेज ग्राउंड म आयोजित होही । महोत्सव म 9 देस के जनजातीय कलाकार समेत 28 राज्य अउ 8 केंद्र सासित प्रदेस के 1500 ले जादा कलाकार भाग लेही।

नई दिल्ली म आयोजित टूरिज्म कॉन्क्लेव के दउरान छत्तीसगढ़ ( chhattisgarh) के मुख्यमंत्री भूपेश बघेल ह किहीन कि ए महोत्सव के माध्यम ले न केवल राष्ट्रीय-अंतर्राष्ट्रीय स्तर म जनजातीय कलाकार मन के बीच ओखर कला के साझेदारी होही बल्कि एक-दूसर के खान-पान, रीति-रिवाज, शिल्प-शैली ल घलो देख-समझ सकही । ए परयास के क्रम म हमन ह नेसनल ट्राइबल डांस फेस्टिवल के रूप म एक थीं बहुत महत्वपूर्ण परंपरा के सुरुवात छत्तीसगढ़ म करे हंन।

( chhattisgarh) सीएम श्री बघेल ह किहीन कि वनवासी, आदिवासी, किसान, ग्रामीण अउ वंचित वर्ग के मनखे मन के सामाजिक अउ आर्थिक ससक्तिकरण म कला, संस्कृति अउ पर्यटन के हमन ह एक मजबूत संसाधन के तौर म इस्तेमाल करे हंन।अउ एखर बढ़िया परिणाम घलो हमन ल मिले हे । आयोजन के दउरान सीएम श्री बघेल ह जानकारी दीन कि छत्तीसगढ़ के डहार ले नौ देस ल आमंत्रण पत्र भेजे गेहे। ये सबो देस पहली घांव रायपुर म अपन प्रस्तुति देही । ए आयोजन म मोजांबिक, मंगोलिया, टोंगो, रशिया, इंडोनेशिया, मालदीव, सर्बिया, न्यूजीलैंड अउ इजिप्ट के जनजातीय कलाकार हिस्सा लेही ।