गोधन एम्पोरियम: माई लोगन मन के नवा बिजनेस आइडिया

• अम्बिकापुर म गोबर ले बने उत्पाद मन के बिक्री बर खुलिस एक्सक्लूसिव शोरूम
• वर्मी कम्पोस्ट, गो-काष्ठ, कण्डा, अगरबत्ती अऊ गोबर पेन्ट के होवत हे बिक्री

अम्बिकापुर म महिला मन ह नवा बिजनेस के आईडिया अपनावत गोबर ले बने उत्पाद मन के बिक्री बर अंबिकापुर म एक एक्सक्लूसिव शो-रूम के सुरुआत करे हे। एला गोधन एम्पोरियम के नाम दे गे हे। ए एम्पोरियम म वर्मी कंपोस्ट खाद के संगे संग गौ-काष्ठ, अगरबत्ती, कंडा अऊ गोबर ले बने पेंट के बिक्री करे जावत हे। अंबिकापुर के मुख्य चौराहा म पाछू के तीन साल ले ए एम्पोरियम के संचालन सरलगहा करे जात हे। एखर संचालन के जिम्मा महिला मन के हाथ म हे। ए एम्पोरियम के उदिम कर के अब तक इहां महिला मन ल 12 लाख रुपिया ले जादा के आमदनी हो गे हे।

कोनों छोटे शॉपिंग मॉल जईसे दिखईया ए अनोखा एम्पोरियम म पूजा-पाठ, हवन बर गौ काष्ठ, अगरबत्ती खरीदत अंबिकापुर के लोगन मन ल देखे जा सकत हे। उहें लिट्‌टी चोखा के शौकिन मनखे मन बर इहां गोबर के कंडा घलो बिकत हे। वर्मी कंपोस्ट ल शहरी क्षेत्र म रहवईया मनखे मन घर के गमला म बागवानी करे बर बिसाथे। गोबर पेंट म तापमान रोके के क्षमता हे जेखर सती जमके एखर बिक्री होवत हे। जईसे-जईसे ए एम्पोरियम के प्रचार प्रसार होवत हे वईसे वईसे इहां बिक्री घलो जोर पकड़त हे। वर्तमान म इहां रोज 40 ले 60 ग्राहक के ग्राहकी होवत हे।

गोधन एम्पोरियम खुले तीन साल हो गे हे अऊ अब तक 12 लाख 49 हजार रूपया के आमदनी इहां ले उदिम करईया महिला मन ल हो गे हे। बछर 2020-21 म 4 लाख 50 हजार, 2021-22 म 4 लाख 87 हजार अऊ बछर 2022-23 म 3 लाख 12 हजार रुपया के आय होए हे।  इहां बुता करईया महिला सदस्य मन ह बताईन कि इहां ले हर महीना समूह के महिला मन 40 हजार रुपिया कमावत हे। इहां गौठान महिला समूह के दो महिला सदस्य बारी-बारी तैनात रहिथे। दूसर दुकान मन कस इहां हफ्ता म एक दिन याने मंगलवार के दिन इहां छुट्‌टी रहिथे।

ए एम्पोरियम ह अंबिकापुर शहरी गौठान के हिस्सा हे। ऐला गौठान ले जुड़े महिला समूह कोती ले संचालित करे जाथे। समूह के महिला अंबिकापुर सिटी लेबल फेडरेशन के सदस्य हे। ए फेडरेशन ह अंबिकापुर म स्वच्छता बर बुता करत हे। अब इहां गोबर ले पेंट अऊ दोना पत्तल तैयार करे के यूनिट घलो सुरू कर दे हे। गौठान समूह के सदस्य मन ल लाभांश के रूप म हर महीना 6 ले 7 हजार रुपिया मिल जाथे।

अम्बिकापुर सिटी लेवल फेडरेशन के अध्यक्ष शशिकला सिन्हा कहिथे कि हमर बर ए ह अद्भुत अनुभव हे कि हमन अभी तक अनाज अऊ दिगर सामान के शो रूम सुने हन फेर ए कभू नई सोचे रेहेन अंबिकापुर के मुख्य चौराहा म आधुनिक साज-सज्जा संग अईसे दुकान चलाबोन। जिहां गोबर ले बने उत्पाद के बिक्री होही।