छत्तीसगढ़ म शासन अऊ कांग्रेस ह मिल के मजदूर मन ल लाही वापस, मुख्यमंत्री भूपेश बघेल ह ट्वीट कर दिस जानकारी
जय जोहार…. पूरा देश के मजदूर मन के घर वापसी बर ट्रेन किराया ल कांग्रेस ह वहन करही। ए घोसना ल कांग्रेस अध्यक्ष सोनिया गांधी ह करे हे। मुख्यमंत्री भूपेश बघेल ह घलो ट्वीट कर कहिन कि छत्तीसगढ़ म शासन अऊ कांग्रेस मिल के मजदूर मन ल लाही।
मुख्यमंत्री बघेल ह ट्वीट कर कहिन कि मजदूर मन के लहुटने के खर्च वहन करे के घोसना अध्यक्ष सोनिया गांधी ह करे हे। ए घोसना ह मानव सेवा के कांग्रेसी विचारधारा अऊ परंपरा ल रेखांकित करत हे। कोटा ले जईसे ह मन बच्चा मन ल लाय हे। आघू घलो शासन अऊ कांग्रेस पार्टी ह मिल के मजदूर मन ल वापस लाही।
प्रदेश कांग्रेस संचार विभाग के अध्यक्ष शैलेश नितिन त्रिवेदी ह कहिन कि जब ले मोदी सरकार अऊ रेलवे ह प्रदेश ले बाहर फंसे मजदूर मन के घर वापसी बर विशेष ट्रेन म किराया ले के घोसना करे हे, तब ले एखर पूरा देश म विरोध होवत रहिस। कांग्रेस पार्टी ह घोसना करे हे कि देश के प्रवासी मजदूर मन ल घर वापस लाय बर किराया ल कांग्रेस के तरफ ले वहन करे जाही। कांग्रेस अध्यक्ष सोनिया गांधी के घोसना के पूरा देश म व्यापक स्वागत होवत हे।
