जय जोहार…. काली ले लॉकडाउन के पांचवां चरण यानी अनलॉक-एक सुरू करे जाही। एमा केन्द्र सरकार ह बड़ अकन नवा छूट ल दे हे। जेखर खाती अन्तर्राज्यीय परिवहन के छूट, शॉपिंग मॉल अऊ रेस्टोरेंट समेत अन्य जरूरी चीज ल खोले के इजाजत होही, लेकिन छत्तीसगढ़ म ए म प्रतिबंध जारी रही। केन्द्र सरकार ह ई-पास के जरूरत ल हटा दे हे, लेकिन प्रदेश म बगैर ई-पास के दूसर राज्य म जाय म प्रतिबंध रही।
राज्य सरकार ह अन्तर्राज्यीय परिवहन म अभी प्रतिबंध ल बरकरार रखे हे। जीएडी के तरफ ले सचिव कमलप्रीत सिंह ह आदेश जारी करे हे कि अन्तर्राज्यीय परिवहन म फिलहाल प्रतिबंध ह जारी रही। हालांकि ई-पास ले दूसर प्रदेश म जाय के इजाजत होही। ऊहचे अन्तर्जिला परिवहन म घलो ई-पास होये म आय-जाय के अनुमति होही। सात जून तक सब्बो स्पोर्ट्स कॉम्प्लेक्स अऊ स्टेडियम ल बंद रखे जाही। सार्वजनिक पार्क घलो सात जून तक नई खोले जाही। राज्य सरकार ह स्पष्ट केहे हे कि ए नियम म अऊ कड़ाई करे जा सकथे, लेकिन छूट के इजाजत ह नई होही। ऊहचे कंटेनमेंट जोन बर सिरिफ आवश्यक सेवा ल अनुमति दे जाही।
