बाप-बेटा के झगरा ल शांत करईया दादी ल मार डारिस नाती ह

जशपुर। कोनो बात ल लेके बाप अउ बेटा म झगरा होवत रिहिस तेला शांत करईया दादी ल नाती ह मार डारिस। ये घटना ह बगीचा थाना इलाका के हरे।

जानकारी के मुताबिक बगीचा थाना इलाका के  घुघरी गांव म आरोपी रामनाथ ह अपन बाप अउ कका ले जमीन ल लेके आए दिन विवाद करत रहीस। शुक्रवार रात म घलो वो ह शराब पीके अइस अउ बाप अउ कका ले जमीन ल लेके फेर झगरा करत रिहिस। इही दउरान ओकर दादी शनियारो बाई ह झगरा ल शांत करईस हे ताहन ओकर बाप अउ कका ह उंहा ले चल दिस।

थोरकिन देर बाद जब उंखर दादी ह ओला दूबारा अउ विवाद मत करबे कहिके समझावत रिहिस। इही दउरान आरोपी नाती रामनाथ ह गुस्सा म आके उही जगह रखे रिहिस टंगिया ले अपन दादी ऊपर हमला कर ओला मउत के घाट उतार दिस। तेकर बाद आरोपी ह रातभर लाश के पास ही बईठे रिहिस अउ बिहनिया वो ह खुद ये बारे म अपन पत्नी अउ घर वाले मन ल बताईस हे। गांव वाले मन के सूचना म पुलिस ह मौका म पहुंच के आरोपी ल गिरफ्तार करिस हे।