गरियाबंद के परेसान ग्रामीन मन दीन उग्र आंदोलन के चेतावनी

जिला म बिजली कटऊती अउ लो वोल्टेज के समस्या
रायपुर. गरियाबंद जिला म बिजली कटउती एक बड़का समस्या बन गेहे. जिला के मैनपुर अउ देवभोग विकासखंड म लोगन बिजली के लगातार कटऊती अऊ लो वोल्टेज ले परेसान हो गेहे. उहें मामला म ग्रामीन मन ह जुम्मेदार अधिकारी मन अउ जनप्रतिनिधि मन ले सिकायत करे के बाद घलोक समस्या के कोनो समाधान होत नजर नई आत हे.

येखरे सेती शानिवार के करीब 6 गांव मन के सैकड़ों ग्रामीन मन ह मैनपुर बिजली कार्यालय के घेराव करिन अउ जमके हंगामा करिन. संगेच तुंरते च समस्या के समाधान करे के मांग करिन हे. ग्रामीन मन ह के आरोप हे के बिजली कटउती ले उंखर जनजीवन बुरी तरह ले प्रभावित होवत हे. लो वोल्टेज अउ बिजली कटउती ले लइका मन के पढ़ई ले लेके घर के दूसर काम खासा प्रभावित होवत हे.

ग्रामीम मन के मानन त बिजली के समस्या लंबा बेर ले उंखर गांव म बने हुये हे. संबंधित अधिकारा मन ले सिकायत करे के बाद घलो आज तक कोनो कार्रवाई नई करे गिस हे. हालांकि अधिकारा मन के आस्वासन के बाद ग्रामीन मन थोड़कन सांत जरूर होइन, लेकिन जल्द समाधान नई होये के हालत म उग्र आंदोलन करे के चेतावनी घलो दीन हे.