बीजापुर के ग्राम गमपुर म स्वास्थ्य विभाग के बिसेस अभियान ग्रामीण मन बर बनिस राहत
रायपुर. दूरस्थ अउ दुर्गम क्षेत्र ग्राम गमपुर म स्वास्थ्य विभाग के टीम ह कठिन परिस्थिति के बीच पहुँच के जनसेवा के सरहनीय उदाहरण पेस करे हे। बीजापुर जिला के उप स्वास्थ्य केंद्र डोडीतुमनार के टीम ह जंगल अउ खराब रद्दा के चुनौती के बाद घलो गांव म ‘यूनिवर्सल हेल्थ स्क्रीनिंग सर्वे’ ला सफलतापूर्वक पूरा करिन। ए दौरान कुल 771 ग्रामीण मन के स्वास्थ्य जांच करे गे हे।
स्वास्थ्य टीम ह ग्रामीण मन के सामान्य स्वास्थ्य जांच के संग मलेरिया, टीबी, एनीमिया, उच्च रक्तचाप (बीपी) अउ गर्भवती दाई-बहिनी मन के बिसेस जांच घलो करिन। सर्वेक्षण के दौरान 5 मलेरिया मरीज मन के पइचान करके तुरते उपचार सुरू करे गे हे। भलकुन 2 संभावित टीबी मरीज अउ 1 हाई रिस्क गर्भवती महिला ला आघू के जांच अउ उपचार बर उच्च स्वास्थ्य केंद्र भेज गे हे।
जांच के दौरान 1 उच्च रक्तचाप अउ 2 एनीमिया ले पीड़ित मरीज मन ला घलो चिन्हांकित करे गे हे। उमन ला जरूरी दवाई अउ स्वास्थ्य संबंधी परामर्श उपलब्ध कराये गे हे।
स्वास्थ्य टीम ह ग्रामीण मन ला साफ-सफाई, संतुलित आहार, नियमित स्वास्थ्य जांच अउ संक्रामक बीमारी ले बचाव के बारे म घलो जागरूक करिन। ग्रामीण मन बताइन कि पहिली बार उंखर गांव के जघा इतने बड़े स्तर म स्वास्थ्य जांच सुबिधा उपलब्ध होय हे, जेखर ले लोगन म स्वास्थ्य के प्रति जागरूकता बाढ़ गे हे।
स्वास्थ्य विभाग के अधिकारी मन कहिन कि दूरस्थ क्षेत्र मन तक स्वास्थ्य सेवा पहुँचाना विभाग के प्राथमिकता हे। टीम के लगातार कोसिस ले ग्रामीण मन ला बेहतर स्वास्थ्य सुबिधा मन ले जोड़े म महत्वपूर्ण सफलता मिलत हे।
ग्राम गमपुर म चलाय गे ए अभियान सिरिफ स्वास्थ्य सुरक्षा के दिसा म महत्वपूर्ण कदम ही नोहे, भलकुन ए ह ए घलो देखाथे कि कठिन परिस्थिति म घलो स्वास्थ्य विभाग लोगन तक सेवा पहुँचाए बर पूरा प्रतिबद्धता के संग बुता करत हे।
