Raipur : मुख्यमंत्री के घोसना म अमल: बुजुर्ग, दिव्यांग अउ तृतीय लिंग समुदाय बर हेल्पलाईन सुविधा सुरु

जय जोहार । (Raipur) मुख्यमंत्री भूपेश बघेल के घोसना के अनुरूप बुजुर्ग, दिव्यांग अउ तृतीय लिंग समुदाय के मनखे मन ल आपातकालीन स्थिति म जरूरी सुविधा उपलब्ध कराय बर नवा हेल्पलाइन सुविधा सुरु करे गेहे । ए सुविधा के जरिए मेडिकल सहायता ,पेंशन के संग विभिन्न योजना म आवत दिक्कत के त्वरित समाधान करे जाही। महिला बाल विकास मंत्री श्रीमती अनिला भेंड़िया अउ नगरीय प्रसासन मंत्री डॉ. शिवकुमार डहरिया ह रविवार के ए नवा सेवा के सुभारंभ करीन। ए नवा हेल्पलाइन सुविधा के संचालन ल समाज कल्याण विभाग डहर ले करे जात हे ।

(Raipur) अंतर्राष्ट्रीय दिव्यांग दिवस के अवसर म आयोजित कार्यक्रम म महिला बाल विकास अउ समाज कल्याण मंत्री श्रीमती अनिला भेंड़िया ह किहीन कि मुख्यमंत्री के अनुमोदन म हरेक बछर लगभग 10 हजार दिव्यांग मन ल मोटराईज्ड ट्राइसाइकिल समेत अन्य पुनर्वास उपकरण वितरित करे जाही । अइसने 15 हजार दिव्यांग मन ल ओखर रूचि के मुताबिक रोजगार ले जोड़े बर कौशल उन्नयन प्रसिक्षण दे जाही।

गौरतलब हे कि मुख्यमंत्री भूपेश बघेल ह राज्य स्थापना दिवस ले बुजुर्ग, दिव्यांग अउ तृतीय लिंग समुदाय बर हेल्पलाईन नम्बर 155326 अउ टोल फ्री नम्बर- 1800-233-8989 के सुविधा सुरु करे के घोसना करे रिहीन । (Raipur) समाज कल्याण विभाग डहार ले ए सुविधा के संचालन प्रायोगिक तौर म करे जात रिहीन । अंतर्राष्ट्रीय दिव्यांग दिवस के अवसर म एखर सुभारंभ होए हे ।