Cine36. आज के बेरा म जिहां छॉलीवुड फिल्म इंड्रस्टी म जम्मो स्टार रिहिस ओखर मन कि फिलिम कुछु खास नई कर पावत हे, चाहे नवा अभिनेता हो या फेर जुन्ना.. सबो के उही हाल हे। हां एक झन यू ट्यूबर ले अभिनेता बने अमलेश नागेश के सितारा ह भले आज के बेरा म गर्दिश म हे। अईसे म सुपर स्टार के तमगा लगाए मन कुरैशी बर घलो ए बेरा परीक्षा के आ गे हे। “डार्लिंग प्यार झुकता नही“ के बाद ओखर जतेक फिलिम आईस एवरेज ही रिहिस।
अब 30 जून के उंखर कैरियर म एक बड़का फिलिम आवत हे “जीरो बनही हीरो“। फिलिम ह भारती वर्मा के हे जाहिर हे उंखर काम म क्वालिटी तो होही। इंड्रस्ट्री म अईसे बहुत कम फिलिम मेकर हे जेन मन पब्लिसिटी म रणनीति बनाके बुता करथे। ए मामला म भारती वर्मा ह कोनों कोना ल खाली नई छोड़े। अईसे म मन कुरैश बर अच्छा माहौल तियार हो गे हे जेखर फायदा ओला मिलना घलो चाही।
ए बात जरूर हे कि सतीश जैन ह मन कुरैशी ल अपन फिलिम म ले रिहिस अऊ फिलिम घलो सुपरहिट रिहिस। फेस असली कद त “जीरो बनही हीरो“ ले उंखर बनना हे। अऊ जेखर बाते अलग होही। काबर कि सतीश जैन के नाम ले हटके एमा सफलता के श्रेय काखरो बर लिखे जाही त ओ ह मन कुरैशी होही। अईसे म मन कुरैशी अपन सुपर स्टार के छवि ल बचाए रखे म कामयाब हो जाही। काबर कि सतीश जैन ह खुदे एक चलत-फिरत ब्रांड बन गे हे। आधा तो ओखर फिलिम ह ओकरे नाम ले चलथे।
ए कोती भारती वर्मा “जीरो बनही हीरो“ के निर्देशक हे अऊ गांव गांव म ए बात तो फैल गे हे कि छत्तीसगढ़ी सिनेमा इंड्रस्ट्री म पहिली कमर्शियल सिनेमा डायरेक्टर ह डेब्यू करे हे। भले ही ओखर ए ह बतौर प्रोड्यूसर उंखर दूसरा फिलिम हरे। अईसे म मन कुरैशी उपर घलो दबाव बनना लाजिमी हे। ए फिलिम ह ओखर व्यक्तिगत स्कोर घलो तय करही।
मन कुरैशी के सबले खास बात ए हावे कि ओ ह जमीन ले जुड़े अभिनेता माने जाथे। ओ ह हर बेरा से सुआद ल चखे हे। एखरे सती ओखर दिमाग म कभू स्टारडम ह हावी नई होईस। सफलता ओखर दिल म कभू हावी नई होईस। बस अपन बुता म फोकस करईया मनखे ओ ह हरे। सबले बड़े बात ए हे कि मन ह दीवाल ले घलो नई कहे हे कि फिलिम ह ओखर सती चलथे। इही कारण होही जेन सतीश जैन ह मन ल फेर अपन फिलिम म मौका दिस।
जीरो बनही हीरो.. बुक माय शो बनिस टिकटिंग पार्टनर
30 जून के दिन रिलीज होवईया फिलिम “जीरो बनही हीरो“ के चरचा छत्तीसगढ़ म जबर होवत हे। पांव के पैरी गाना ह त वईसे भी सोशल मीडिया म कमाल करत हे। रोज सैकड़ा भर ले जादा रील बनत हे। अईसे म कहे जा सकत हे कि फिलिम के जबर प्रचार हो गे हे। मंगल के दिन एक नवा रिकॉर्ड बन गे हे… प्रसिद्ध टिकट एप बुक माय शो अब “जीरो बनही हीरो“ के टिकटिंग पार्टनर बन गे हे। इंदौर ले आए रोहितजी अऊ “जीरो बनही हीरो“ के डिस्ट्रीब्यूटर लाभांश तिवारी ह डायरेक्टर अऊ प्रोड्यूसर भारती वर्मा ल ए खुशखबरी सुनाए हे। बता देन कि “जीरो बनही हीरो“ एक अईसे फिलिम हे जेखर गठबंधन बुक माय शो संग होए हे। एक कोती ए भारती वर्मा पहली सीजी फिल्म डायरेक्टर हे उहें उंखर फिलिम के संग बुक माय शो घलो पहली टिकटिंग पार्टनर बन गे हे।
