पीएम जनमन आवास योजना ले हीरा कमार के परिवार के पक्का घर के सपना होईस साकार

रायपुर. प्रधानमंत्री जनमन आवास योजना के तहत केंद्र सरकार डहर ले दूर-दराज अउ पिछड़ चुके इलाका मा रहइया ‘विशेष पिछड़ी जनजाति’ (PVTG) के मनखे मन के जिनगी ला सुधारे बर पक्का घर दिये जात हे। जेकर ले ओमन ला सुरक्षित अउ सम्मान वाला ठिकाना मिल सके अउ ओमन बने ढंग ले रह सकें। महासमुंद जिला मा विशेष पिछड़ी जनजाति के चिन्हारी करे गे 678 कच्चा मकान मा रहइया परिवार मन बर पीएम जनमन योजना ले मंजूरी के बाद, अब लगभग जम्मो परिवार मन ला पक्का छत मिल गे हे।

एही कड़ी मा जिला के ग्राम झालखम्हरिया के कमार जनजाति के मधु कमार के जिनगी मा एक नवा उजियारा तब आईस, जब ओला पीएम जनमन आवास योजना के तहत अपन पक्का घर मिलीस। कतको बछर ले घास-फूस अउ माटी के कच्चा घर मा रह के मुसकिल मन के सामना करइया मधु कमार अउ ओकर बाबू हीरालाल कमार बर ए घर ह सपना सच होय जइसन आय।

मधु कमार ह बताथे कि पहिली ओकर परिवार ह बरसात, गरमी अउ जाड़ के दिन मा बहुत दुख पावत रिहिस। कच्चा घर के सेती सुरक्षा अउ बीमारी के डर हमेशा बने रहय। फेर अब पक्का घर मिले ले ओकर जिनगी मा भरोसा, सुरक्षा अउ सम्मान के भाव आ गे हे। मधु कमार के बाबू हीरालाल ह भरराय गला ले बताइस कि अब ओला अपन परिवार के संग सुरक्षित अउ सम्मान के साथ रहे के मौका मिलीस हे। ओमन केंद्र अउ राज्य सरकार ला धन्यबाद देवत कहिन कि ए योजना ह ओमन जइसन जरूरतमंद परिवार मन बर कोनो वरदान ले कम नई आय। अब ओकर परिवार ह बिना कोनो फिकर के खुसी-खुसी अपन जिनगी बितावत हे।