12 से 26 फरवरी तक आयोजित होहि राजिम कुंभ कल्प, अध्यात्म अउ संस्कृति के होहि भव्य आयोजन

रायपुर। छत्तीसगढ़ के प्रयाग के रूप म प्रसिद्ध राजिम म 12 फरवरी ले 26 फरवरी 2025 तक कुंभ कल्प के भव्य आयोजन करे जाहि। ए बछर ए अद्भुत धार्मिक अउ सांस्कृतिक आयोजन 52 एकड़ के नवा प्रस्तावित मेला स्थल म संपन्न होहि। मुख्यमंत्री विष्णु देव साय ह मंत्रालय महानदी भवन स्थित बैठक कक्ष म आज राजिम कुंभ कल्प के तैयारी के संबंध म उच्च स्तरीय समीक्षा बइठका करिन अउ आवश्यक निर्देश दिन। ओहा शाही स्नान, गंगा आरती, संत समागम समेत कुंभ कल्प के प्रमुख आयोजन अउ श्रद्धालू मन बर सुविधाजनक व्यवस्थाएं सुनिश्चित करे बर कहीन हे।

मुख्यमंत्री साय ह कहिन कि राजिम कुंभ कल्प 2025 म धर्म, आस्था अउ संस्कृति के अद्भुत समागम होही अउ ए छत्तीसगढ़ के समृद्ध परंपरा अउ संस्कृति ल प्रदर्शित करे के घलो सुघ्घर माध्यम हे। हमन ल ए सुनिश्चित करना हे कि श्रद्धालु मन ल इहां अविस्मरणीय अनुभव मिलय अउ ए आयोजन हमार गौरवशाली विरासत ल देश-दुनिया तक पहुंचाए।
मुख्यमंत्री ह राजिम कुंभ कल्प के आयोजन म शामिल समस्त विभागों अउ प्रशासनिक अमला ल आपस म समन्वय स्थापित करके कार्य करे के निर्देश दिन। ओहा श्रद्धालु मन के आवागमन के व्यवस्था, सुरक्षा संबंधी उपाय अउ स्वच्छता बर विशेष ध्यान दे बर कहिन। अउ कहिन कि “हमर जम्मों झन के जिम्मेदारी हे कि ए आयोजन ल सफल बनान अउ छत्तीसगढ़ के पहिचान के रूप म एला स्थापित करन। ओहा 12 फरवरी के आयोजित माघी पुन्नी स्नान, 21 फरवरी जानकी जयंती के अवसर म संत समागम अउ 26 फरवरी के होवइया शाही स्नान के तैयारी म विशेष ध्यान दे बर कहिन।
मुख्यमंत्री साय ल अपर मुख्य सचिव सुब्रत साहू ह राजिम कुंभ कल्प 2025 के आयोजन ले जुड़े महत्वपूर्ण जानकारी दिस। ओहा पीपीटी के माध्यम ले आयोजन स्थल म विभिन्न गतिविधी बर निर्धारित स्थान के बारे म बताइन। कुंभ कल्प म नागरिक सुविधा, साधु संत के आवागमन, शाही स्नान अउ गंगा आरती ल लेके विभाग के तैयारी के बारे म जानकारी दिस।
बता दन कि 12 फरवरी के माघी पूर्णिमा के पावन अवसर म राजिम कुंभ कल्प के शुभारंभ होहि अउ 26 फरवरी महाशिवरात्रि के एखर समापन होहि। राजिम कुंभ कल्प पैरी, महानदी अउ सोंढूर नदी के संगम म आयोजित होहि। श्रद्धालु ए पवित्र नदिया म स्नान करके पुण्य के लाभ प्राप्त करहि।
राजिम कुंभ कल्प के संपूर्ण आयोजन बर पर्यटन विभाग के नोडल बनाए गिन हे। 15 दिन तक चलइया ए कुंभ कल्प म पिछला बछर के भांति ए बछर घलो साधु संत के विराट समागम होहि। माघी पुन्नी स्नान, शाही स्नान, जानकी जयंती के अवसर म संत समागम विशेष रूप ले आयोजित होही। प्रतिदिन सांस्कृतिक गतिविधी के आयोजन, मेला, मड़ई, मीना बाजार अउ विभागीय प्रदर्शनी घलो कुंभ कल्प के विशेष आकर्षण के रूप म शामिल होही।
बैठक म विधायक रोहित साहू, मुख्य सचिव अमिताभ जैन, मुख्यमंत्री के प्रमुख सचिव सुबोध सिंह, मुख्यमंत्री के सचिव राहुल भगत, सचिव धर्मस्व अन्बलगन पी., संचालक संस्कृति विवेक आचार्य, आईजी रायपुर अमरेश मिश्रा, कलेक्टर गरियाबंद दीपक अग्रवाल सहित अन्य विभाग के अधिकारी मन मौजुद रहिन।