सक्षम योजना ले माई लोगिन मन बनत हे आत्मनिर्भर, 1 हजार महिला मन ल लाभ देय के रखे गे हे लक्ष्य

रायपुर। छत्तीसगढ़ महिला कोष के तहत संचालित सक्षम योजना ह माई लोगिन मन ल आत्मनिर्भर बनाए बर महत्वपूर्ण कार्य करत हे। ए योजना ले जरूरतमंद माई लोगिन मन आर्थिक संबल प्रदान करे म महती भूमिका निभावत हे। ए योजना के उद्देश्य विधवा, परित्यक्ता, तलाकशुदा अउ अविवाहित महिला मन ल स्वावलंबन के दिशा म सशक्त बनाना हे।

नवा बछर के पहिला दिन बेमेतरा जिला के माई लोगिन मन ल महिला कोष अउ सक्षम योजना के तहत 19.80 लाख रूपया के आर्थिक सहायता प्रदान करे गिस। जेमा ले महिला बाल विकास विभाग ह 14 महिला मन ल सक्षम योजना के तहत 10.80 लाख रूपया अउ स्व सहायता समूह मन ल 9  लाख रूपए के राशि के चेक प्रदान करे गिस। माई लोगिन मन ह मुख्यमंत्री विष्णु देव साय अउ महिला अउ बाल विकास मंत्री लक्ष्मी राजवाड़े ल धन्यवाद देवत हुए कहिन कि शासन के यहे योजना हम महिला मन ल सशक्त करे म महत्वपूर्ण भूमिका निभावत हे, जेखर ले हमन आर्थिक तौर म आत्मनिर्भर होवत हन।

बता दन कि सक्षम योजना महिला सशक्तिकरण के दिशा म बड़का कदम हे, जेखर तहत महिला मन मात्र 3 प्रतिशत वार्षिक ब्याज दर म ऋण प्राप्त करके व्यवसाय शुरू कर सकथे। ए योजना के तहत 2024-25 म छत्तीसगढ़ के 1 हजार महिला मन ल लाभ देय के लक्ष्य रखे गे हे।