”पति हा बहुते जादा मया करथे, परवाह बहुत करथे, कभू झगरा नई करय, तेकर सेती मोला तलाक चाही”
‘पति हा बहुते जादा मया करथे, परवाह बहुत करथे, कभू झगरा नई करय, ओकर संग झगरा होय बर तरस गे हंव, मोला तलाक चाही।’ ये कहना हे एक महिला के जेन हा अपन पति ले तलाक ले बर कोर्ट म अर्जी दे हे। ये खबर नईदिल्ली ले आए हे।
नईदिल्ली। एक महिला हा अपन पति के जादा मया अउ परवाह करे ले परेसान होके शरिया कोर्ट म तलाक के अर्जी दे हे। महिला के आरोप हे कि ओकर पति हा ओकर ले कुछ जादा ही मया करथे, जेकर ले ऊब के तलाक लेना चाहथे।
जानकारी के मुताबिक महिला के कहना हे कि ओकर पति हा कुछ जादा ही प्यार करथे, जेला वो बरदास्त नई कर पावत हे। महिला हा कोर्ट ले किहिस कि ओकर पति ओला कभू चिल्लावय न ही अउ न तो कभू ओला उदास होवन दय।
घर के साफ-सफाई म मदद भी करथे अउ कभू-कभू ओकर बर खाना घलो बनाथे। एक साल होगे सादी होय, फेर उंकर बीच म एको बार भी झगरा नई होय हे। महिला के कहना हे कि वोहा अपन पति संग लड़ई करे बर तरस गे हे।
महिला के पति हमेसा ओला माफ़ कर देथे। संगे-संग ओकर बर तोहफा के बौछार लगा देथे, एकर सेती महिला हा परेसान होके कोर्ट ले तलाक के गुहार लगाए हे।
दूसर तरफ महिला के पति के कहना हे कि वो हा बस एक परफेक्ट अउ आदर्स पति बनना चाहथे अउ कोर्ट ले यहू अपील करे हे कि ओकर पत्नी ला केस वापस ले बर केहे जाय। कोर्ट हा घलो पति पत्नी ला आपसी मतभेद सुलझाए बर केहे हे।
