अवैया फसल के पहिली किसान ल राशि नई मिलही त दे दुहूँ मंत्रीपद ले इस्तीफा… जानव कोन किहीस अइसन

जय जोहार…. छत्तीसगढ़ के स्वास्थ्य अउ पंचायत मंत्री टीएस सिंहदेव के बड़का बयान ह सामने आय हे। स्वास्थ्य मंत्री सिंहदेव ह कहिन कि अवैया फसल के पहिली किसान मन ल अन्तर के राशि के दूसर किस्त दे बर कैबिनेट म तय करे गे हे।

यदि अवैया फसल के पहिली प्रति क्विंटल अंतर के राशि ह किसान मन के खाता म नई गिस, त मे हा इस्तीफा दे दुहूँ।
मंत्री सिंहदेव ह कहिन कि विपक्ष ह किसान मन ल ले के राजनीति करे ल बाज नई आवत हे। सरलघा दुष्प्रचार कर भ्रमित करे के काम करत हे। 2500 रूपिया प्रति क्विंटल के राशि के पहिली किस्त दे दे गे हे।

दूसर किस्त ल कैबिनेट म दे बर अवैया फसल के पहिली तय करे गे हे। अगर ए बेरा तक किसान मन के खाता म राशि नई जाही, त वो पद ले इस्तीफा दे देही।
स्वास्थ्य मंत्री सिंहदेव ह कहिन कि विपक्ष ह लोग अउ किसान मन ल भ्रमित कर गुमराह करे के सरलघा कोशिश करत हे। कांग्रेस सरकार ह जेन वादा करे हे, उन सब्बो वादा ल पूरा करे बर प्रतिबद्ध हे। सरकार ह एक-एक कर अपन वादा ल पूरा करत हे।