छत्तीसगढ़ म 19 जून ले सुरू होही रोका-छेका संकल्प अभियान

जय जोहार…. छत्तीसगढ़ सरकार के तरफ ले प्रदेश म फसल अऊ पशु ल सुरक्षित रखे बर 19 जून ले रोका-छेका संकल्प अभियान के शुरुआत करे जाही। ए अभियान ह 30 जून तक चलही। एखर खाती खुले म पशु के चराई म रोक लगाय के संग रद्दा म घुमइया मवेशी ल सुरक्षित रखे बर लोगन मन ल जागरूक करही।

ए अभियान के उद्देश्य खरीफ फसल अऊ शहर के आसपास के फसल, बाड़ी, उद्यान आद के सुरक्षा ल मवेशी ले करना हे। नगरीय क्षेत्र म अभियान के संबंध म नगरीय प्रशासन विकास विभाग के तरफ ले सब्बो जिला कलेक्टर, नगरपालिका निगम के आयुक्त अऊ नगर पंचायत के मुख्य नगर पालिका अधिकारी मन ल दिशा-निर्देश जारी करे गे हे।
नगरीय क्षेत्र म आवारा पशु ले मुक्त, साफ-सुथरा अऊ दुर्घटना मुक्त रखे बर 19 जून ले 30 जून तक प्रदेश के सब्बो नगरीय निकाय म घलो रोका-छेका अभियान चलाय जाही। संगसंग 19 जून के पशुपालक मन ल अपन आसपास के वातावरण अऊ शहर ल स्वच्छ साफ-सुथरा अऊ दुर्घटना मुक्त रखे बर संकल्प पत्र भरवाय जाही। जेखर बर नगरीय निकाय म मुनादी के माध्यम ले व्यापक प्रसार-प्रचार करे जाही।