पुनिया के बयान म भाजपा के आपत्ति ऊपर कांग्रेस के पलटवार, कहिन – बुरा का लगिस, भाजपाई पहिली गोडसे मुर्दाबाद के नारा लगाए

जय जोहार रायपुर… भाजपा के नेता पुनिया के बयान म आपत्ति करे बर के पहिली ये ल बतावय कि वो हा गोडसे ल बुरा मानत हे या मोदी जी ल बुरा मानत हे? अगर गोडसे ल बुरा मानत हस तो भाजपा के नेता पहिली गोडसे मुर्दाबाद के नारा लगाएं। ये बात ल कांग्रेस संचार विभाग के अध्यक्ष शैलेष नितिन त्रिवेदी ह पत्रकार वार्ता म कहिन।

शैलेष नितिन त्रिवेदी ह कहिन कि भाजपा के सांसद साध्वी प्रज्ञा अऊ साक्षी महाराज जैसा नेता मन ह गोडसे ल देशभक्त कहत हे, फिर भाजपा नेता मन ल पुनिया के गोडसे अऊ मोदी के संबंध म दृष्टांत दे बर कोनो बात म आपत्ति क्यों हे। भाजपा नेता मन ह ये टिप्पणी ल अभद्र मानत विरोध प्रदर्शन के घोसना करिस हे, ये ऊंखर अधिकार हे। एमा जेन बड़े बात ह उभर के सामने आवत हे कि गोडसे ल देशभक्त केहे वाले पार्टी ह अंतत: गोडसे कहे जाए ल अभद्र मानके वास्तविकता ल स्वीकार कर लिस हे।

पत्रकार वार्ता म वो हा कांग्रेस प्रवक्ता जयवीर शेरगिल ल धमकी दिए जाए के निंदा करिस। वो हा कहिन कि करंट लगाए अऊ गोली मारने वाला  ह अब दुष्कर्म अऊ हत्या के धमकी दे बर उतर आए हे। शेरगिल ह पुलवामा के शहीद मन के परिवार जन के संग न्याय के बात उठाइस हे। 14 फरवरी के एआईसीसी के मुख्यालय म पत्रकार वार्ता म पुलवामा मामला म मोदी सरकार के दोहरा चरित्र ल उजागर करत हुए सवाल खड़े करिस, जेन ह धमकी देने वाले ल नागवार गुजरिस हे।