जगदलपुर म 356 करोड़ रूपया के विकास कार्य के लोकार्पण-शिलान्यास, सुघ्घर प्राकृतिक परिवेश फेर बनत हे बस्तर के पहिचान
जगदलपुर। बस्तर के मूल पहिचान ओखर सुघ्घर प्राकृतिक परिवेश, समृद्ध जनजातीय संस्कृति अउ शांत वातावरण ले रहे हे। हमन ह एक बछर म बस्तर के मूल पहिचान ल वापस देय के महती कार्य करे हन। आज बस्तर के प्रशंसा केवल भारत म ही नई, बल्कि पूरा दुनिया म होवत हे। संयुक्त राष्ट्र पर्यटन संगठन ह ग्राम धुड़मारास ल विश्व के 20 सर्वश्रेष्ठ पर्यटन गांवों म सम्मिलित करिस हे। मुख्यमंत्री विष्णु देव साय ह आज जगदलपुर के पीजी कॉलेज हॉस्टल मैदान म आयोजित विकास कार्यो के लोकार्पण-शिलान्यास कार्यक्रम ल सम्बोधित करत ए बात ल कहीन। ओ मन ह ए मौका म 356 करोड़ 44 लाख रूपया के लागत ले होवइया 288 विकास कार्य के लोकार्पण अउ भूमिपूजन अउ विभिन्न योजना के तहत हितग्राही मन ल एक करोड़ 55 लाख रूपया ले ज्यादा के राशि के चेक अउ सामग्री के वितरण करिन।
मुख्यमंत्री ह कहिन कि बस्तर अंचल के तरक्की अउ उन्नति बर राज्य सरकार ह पूरा प्रतिबद्धता ले कार्य करत हे। बस्तर अंचल के आवश्यकता ल ध्यान म रखत, जम्मों बुनियादी सुविधा अउ संसाधन उपलब्ध कराए जात हे। बस्तर म हमन विश्वास के संग विकास करना चाहत हन, जेमा हमन ल सफलता मिलत हे। छत्तीसगढ़ के जनता ले मोदी के गारंटी के रूप म हमने जेन वादा करे रेहेन, वो हर वादा हम निभावत हन। सरकार बने के एक बछर के भीतर मोदी के गारंटी म ले अधिकांश ल हमन पूरा करे हन।
मुख्यमंत्री साय ह कहिन कि बस्तर के संवेदनशील इलाके के लोगन मन ल आवास उपलब्ध कराए बर हमार सरकार ह केंद्र सरकार ले अनुरोध करे रिहीस, जेखर सेती ए क्षेत्र बर अलग ले 15 हजार प्रधानमंत्री आवास घलो स्वीकृत करे गिस।
मुख्यमंत्री ह कहिन कि प्रधानमंत्री मोदी ह 18 लाख पीएम आवास स्वीकृति के गारंटी दे रिहीन, ओला पूरा करत हमार सरकार के शपथ के दूसर दिन हमन आवासहीन हितग्राही मन ल आवास के स्वीकृति दे हन। स्वीकृत पीएम आवास अब बनत जात हे अउ लाभान्वित परिवार के गृह प्रवेश घलो होवत हे। ओमन ह कहिन कि 7 जनवरी के देश के कृषि अउ किसान कल्याण मंत्री शिवराज सिंह चौहान छत्तीसगढ़ आहि, ए दिन घलो प्रदेश म आवासहीन हितग्राही मन ल लाभान्वित करे जाहि। ओमन कहिन कि हमन नक्सल प्रभावित अउ पिछड़ा क्षेत्र के विकास बर नियद नेल्ला नार योजना के शुरुआत करे हन, जेमा सुरक्षा कैम्प के 5 किलोमीटर के परिधि म स्थित गांव म सरकार के 17 विभागों के 53 कल्याणकारी योजना अउ 28 सामुदायिक सुविधा के तहत मूलभूत सुविधा के विकास तेजी ले सुनिश्चित करत हे।
मुख्यमंत्री ह कहिन कि हमन राष्ट्रीय शिक्षा नीति घलो लागू कर दे हन, आज प्रदेश के जम्मों स्कूल म 18 स्थानीय भाषा म पढ़ाई होवत हे। बस्तर म लइका मन हल्बी अउ गोंडी बोली म पढ़ाई करत हे। डॉक्टर बने के इच्छा रखइया हमार युवा मन के हित म हमने एमबीबीएस के पढ़ाई हिन्दी माध्यम म करवाए के निर्णय ले हन। पीएम श्री स्कूल योजना म 341 स्कूल म आधुनिक शिक्षा के अनुकूल व्यवस्था करत हन। शहर अउ गांव के विकास अनवरत होवत हे। प्रदेशभऱ म एक बछर के अन्दर शहरी क्षेत्र के विकास बर 7 हजार करोड़ रूपया जारी करे जा चुका हे।
उपमुख्यमंत्री अरुण साव ह कार्यक्रम ल सम्बोधित करत, नगर पंचायत बस्तर म अमृत मिशन योजना के अंतर्गत घर-घर शुद्ध पेयजल पहुंचाए बर 50 करोड़ रूपया देय के घोषणा करिन। वन अउ सहकारिता मंत्री केदार कश्यप ह कहिन कि केंद्र म प्रधानमंत्री मोदी अउ प्रदेश म मुख्यमंत्री साय के डबल इंजन के सरकार हे, जेखर ले विकास के गति तेज होइस हे। कार्यक्रम ल राजस्व मंत्री टंकराम वर्मा, जगदलपुर विधायक किरण सिंह देव अउ बस्तर सांसद महेश कश्यप ह घलो सम्बोधित करिन। ए अवसर म लोकसभा क्षेत्र कांकेर भोजराज नाग, विधायक विनायक गोयल अउ चैतराम अटामी सहित क्षेत्र के अन्य जनप्रतिनिधी अउ गणमान्य नागरिक अउ बड़का संख्या म ग्रामीण मन मौजूद रिहीन।
