Karnataka के टीम ह छत्तीसगढ़ के आंगनबाड़ी केन्द्र के सुविधा ल सराहीन
जय जोहार । कर्नाटक (Karnataka) राज्य के टीम ह गुरूवार के छत्तीसगढ़ के आंगनबाड़ी केन्द्र म संचालित प्रारंभिक बाल्यावस्था देखरेख अउ सिक्षा (ईसीसीई) समेत कई ठीन गतिविधि के अवलोकन करे बर पहुंचीन । टीम ह टाटा ट्रस्ट, यूनिसेफ, महिला अउ बाल विकास विभाग के समन्वय ले दुर्ग जिला के ग्राम मोहलई के आदर्स आंगनबाड़ी केन्द्र अउ ग्राम कोटनी के आंगनबाड़ी समेत गौठान के अवलोकन करीन ।
टीम ह ईसीसीई गतिविधि के संगेसंग छत्तीसगढ़ म लागू नवाचार मुख्यमंत्री सुपोसण अभियान, सुपोसण वाटिका, गौठान अउ सामुदायिक सहयोग ल सराहीन अउ कर्नाटक राज्य म घलो एमन ल लागू करे बर आवश्यक कार्यवाही करे के बात ल कहीन। टीम म कर्नाटक (Karnataka) राज्य के 2 परियोजना अधिकारी, टाटा ट्रस्ट अउ यूनिसेफ के सेटर फॉर लर्निंग रिसोर्सेस के प्रतिनिधि सम्मिलित रिहीन । टीम के प्रतिनिधित्व कर्नाटक राज्य महिला अउ बाल विकास विभाग के उपसंचालक श्री प्रभाकर करत रिहीन ।
टीम ह स्थानीय भ्रमण घलो करीन अउ हितग्राही मन ले बातचीत कर वस्तुस्थिति के जायजा लीन । एखर बाद टीम के सदस्य डहार ले पावर प्वाईंट प्रेजेंटेसन के माध्यम ले जिला म संचालित कई ठीन गतिविधि ल विस्तार ले जानीन । भ्रमण के दउरान जिला कार्यक्रम अधिकारी विपिन जैन, सेक्टर रसमड़ा के पर्यवेक्षक, आंगनबाड़ी कार्यकर्ता, लईका मन के अभिभावक, महिला स्व-सहायता समूह के सदस्य अउ स्थानीय मितानीन घलो मौजूद रिहीन ।
