मुख्यमंत्री भूपेश बघेल 6 जून के कोण्डागांव जिला के बेड़मा गांव म आयोजित कार्यक्रम म संघरही, दिही 213 करोड़ रुपिया के विकास कार्य के सौगात
रायपुर. मुख्यमंत्री भूपेश बघेल 6 जून के कोण्डागांव जिला के बेड़मा गांव म आयोजित कार्यक्रम म संघरही। निर्धारित कार्यक्रम अनुसार मुख्यमंत्री बघेल दोपहर 12 बजे पुलिस ग्राउण्ड हेलीपेड रायपुर ले हेलीकॉपटर ले कोण्डागांव जिला के ग्राम बेड़मा बर निकलही। मुख्यमंत्री दोपहर 12.45 बजे ले ग्राम बेड़मा के बाजार मैदान म आयोजित कार्यक्रम देवगुड़ी, मातागुड़़ी के सामुदायिक वन अधिकार पत्र वितरित करही। अऊ ‘डॉक्टर तुमचो दुआर‘ मोबाइल मेडिकल यूनिट ल हरियर झण्डी दिखाही। मुख्यमंत्री कार्यक्रम म 213 करोड़ रुपिया के विकास कार्य मन के सौगात दिहीं। ओमन इहां कैरियर मार्गदर्शिका पुस्तिका के विमोचन, मांझीनगर बायोडायवर्सिटी पार्क के परिकल्पना के प्रदर्शन अऊ संभाग स्तरीय कलार समाज के शपथ ग्रहण कार्यक्रम म घलो संघरही। मुख्यमंत्री बघेल ग्राम बेड़मा ले दोपहर 2.20 बजे हेलीकॉप्टर ले प्रस्थान कर अपरान्ह 3 बजे पुलिस ग्राउण्ड हेलीपेड रायपुर लहुटही।
