श्रमिक समाज के आधारशिला अउ ओखर बिना विकास के कल्पना अधूरो हे: श्रम मंत्री लखनलाल देवांगन

श्रम मंत्री ह श्रमवीर मन ल दीन अंतर्राष्ट्रीय श्रमिक दिवस के सुभकामना

रायपुर. अंतर्राष्ट्रीय श्रमिक दिवस के मउका म परदेस के श्रम मंत्री लखनलाल देवांगन ह राज्य के श्रमिक मन ल गाड़ा-गाड़ा बधाई अउ सुभकामना दीन। ओमन जम्मो मेहनतकश श्रमिक मन के सुखमय अउ उज्जर भविस्स के कामना करत कहिन कि 1 मई के दिन श्रमिक मन के मेहनत, समरपन अउ ओकर योगदान के प्रति आभार जताए के एक खास मउका ए।

मंत्री श्री देवांगन ह कहिन कि श्रमिक समाज के आधारशिला अउ ओखर बिना विकास के गोठ अधूरो हे। ओमन श्रमिक मन के सामाजिक अउ आर्थिक खुसहाली बर राज्य सरकार के संकलप ल दोहरावत कहिन कि छत्तीसगढ़ सरकार ह श्रमिक मन के संग जम्मो जरूरतमंद मनखे मन के निरंतर विकास बर हमेसा कोसिस करत हे। ओमन बताइन कि राज सरकार कोति ले श्रमिक मन अउ ओकर परिवार ल अलग-अलग योजना के लाभ तुरंते पहुंचाए जात हे। श्रम विभाग के अंदर चलत तीनों मंडल—भवन एवं अन्य सन्निर्माण कर्मकार मंडल, संगठित कर्मकार मंडल अउ राज सामाजिक सुरक्षा एवं श्रम कल्याण मंडल के माध्यम ले योजना ल बने ढंग ले लागू करे जात हे।

मंत्री श्री देवांगन ह कहिन कि बीते सवा दू साल म अलग-अलग योजना के तहत लगभग 800 करोड़ रुपिया के राशि डीबीटी (DBT) के माध्यम ले सीधा श्रमिक मन के बैंक खाता म पहुंचाए जा चुके हे। एकर ले न केवल श्रमिक मन ल, बल्कि ओकर परिवार मन के सामाजिक अउ आर्थिक हालत म घलो सुधार आए हे।