छत्तीसगढ़ एकलव्य विद्यालय के बड़े उपलब्धि

• कांकेर एकलव्य के नोनी कृतिका टेकाम ह देशभर के एकलव्य विद्यालय मन म करिस टॉप

• 10वीं सीबीएसई बोर्ड परीक्षा म पाइस पहिली स्थान
• राज म चलत 11 एकलव्य विद्यालय के परीक्षा परिणाम शत-प्रतिशत
• मुख्यमंत्री विष्णु देव साय अउ मंत्री नेताम ह दीन बधाई अउ सुभकामना

रायपुर. छत्तीसगढ़ के कांकेर के रहइया कृतिका टेकाम ह सीबीएसई 10वीं बोर्ड के परीक्षा म पहिली स्थान पाके बड़े उपलब्धि हासिल करे हवय। होनहार नोनी कृतिका ह पूरा देस म चलत लगभग 750 एकलव्य आदर्श आवासीय विद्यालय म सबले जादा नंबर पाके छत्तीसगढ़ के नाम उज्जर करे हवय। ए बड़े उपलब्धि बर मुख्यमंत्री विष्णु देव साय ह कृतिका ल ओकर उज्जर भविस्स बर बधाई अउ सुभकामना दीन।

मुख्यमंत्री विष्णु देव साय ह कांकेर के होनहार नोनी कृतिका टेकाम ल सीबीएसई 10वीं बोर्ड परीक्षा म देशभर के एकलव्य विद्यालय म पहिली स्थान पाए बर गाड़ा-गाड़ा बधाई देवत कहिन कि, “ए उपलब्धि ह न केवल कृतिका के प्रतिभा अउ ओकर गुन के फल ए, बल्कि छत्तीसगढ़ म पढ़ई के गुन (गुणवत्ता) अउ जनजातीय लइका मन के सर्वांगीण विकास बर करे जात कोसिस के सफलता के परमान घलो ए।”

ओमन कहिन कि एकलव्य आदर्श आवासीय विद्यालय के माध्यम ले राज के होनहार लइका मन ल बने मउका मिलत हे, जेकर ले ओमन देस भर म अपन पहिचान बनावत हें। मुख्यमंत्री ह जम्मो सफल लइका मन ल सुभकामना देवत ओकर उज्जर भविस्स के कामना करिन अउ कहिन कि राज सरकार पढ़ई-लिखई के छेत्र म अइसने बने काम ल हमेसा बढ़ावा देवत रही।

आदिम जाति विकास मंत्री रामविचार नेताम ह कांकेर के नोनी कृतिका टेकाम ल बधाई देवत कहिन कि ए उपलब्धि ह हमर परदेस के जनजातीय लइका मन के बुद्धि,मेहनत अउ ओकर लगन के सब्बो ले बने उताहरन ए। ओमन कहिन कि एकलव्य विद्यालय के सेती जनजातीय इलाका के लइका मन ल बने पढ़ई, नीक संसाधन अउ सुग्घर माहौल मिलत हे, जेकर ले ओमन देस भर म नाम कमावत हें। मंत्री श्री नेताम ह कहिन कि राज सरकार जनजातीय लइका मन के पढ़ई अउ विकास बर हमेसा तइयार हे।

धियान देवई बात हे कि सीबीएसई ह हाल ही म पढ़ई के सत्र 2025-26 बर 10वीं बोर्ड परीक्षा के रिजल्ट निसारे हे, जेमा छत्तीसगढ़ के नोनी कु. कृतिका टेकाम ह पूरा देस भर के एकलव्य विद्यालय म पहिली नंबर पाइस हे।

आदिम जाति विकास विभाग के प्रमुख सचिव सोनमणि बोरा ह बताइन कि कृतिका टेकाम ह कांकेर जिला म चलत एकलव्य आदर्श आवासीय विद्यालय म रहके अपन पढ़ई करत रिहिस। पूरा देस म चलत लगभग 750 एकलव्य विद्यालय म 97 प्रतिशत नंबर पाके ओकर नाम देस म पहिली नंबर म आए हे, जेकर ले राज के संगे-संग आदिम जाति विभाग के मान घलो बढ़ गे हे। ओकर संग दूसर लइका मन घलो परीक्षा म बने रिजल्ट लाए हें। छत्तीसगढ़ म चलत कुल 75 एकलव्य विद्यालय म ले हाई स्कूल स्तर के 71 विद्यालय हें, जेमा ले 11 विद्यालय के रिजल्ट शत-प्रतिशत (100%) रिहिस।

जानबा होवय कि हमर राज म चलत 75 एकलव्य विद्यालय म अनुसूचित जनजाति वर्ग के लइका मन ल सुग्घर पढ़ई के संग ओकर मानसिक अउ शारीरिक सेहत के घलो बने धियान रखे जाथे। एकरे फल ए कि सत्र 2025-26 म चौथी एकलव्य विद्यालय राष्ट्रीय खेल प्रतियोगिता म छत्तीसगढ़ के एकलव्य टीम ह बने खेल देखाके पूरा देस म दूसर स्थान हासिल करिस।

आयुक्त डॉ. सारांश मित्तर ह बताइन कि अइसने भारत सरकार, पंचायती राज मंत्रालय, नई दिल्ली कोति ले रखे गे ‘मॉडल यूथ ग्राम सभा’ प्रतियोगिता म एकलव्य आदर्श आवासीय विद्यालय, कोसमबुड़ा (जिला-गरियाबंद) ल देस के 800 विद्यालय म ले राष्ट्रीय विजेता चुने गे हे। गरियाबंद के ए लइका मन ल ओकर बने प्रदर्शन बर 28 जनवरी 2026 म राष्ट्रीय स्तर म सम्मानित करे गिस, अउ ए विद्यालय ल एक करोड़ रुपिया के ईनाम राशि घलो दे गे हवय।