चित्रकोट महोत्सव के शुभारंभ करिन विधायक दीपक बैज

रायपुर, बस्तर के प्रसिद्ध चित्रकोट महोत्सव के भव्य शुभारंभ आज चित्रकोट म स्थानीय विधायक दीपक बैज ह करिन। तीन दिन तक चलइया ए महोत्सव म सांस्कृतिक कार्यक्रम मन के अलावा खेलकूद प्रतियोगिता घलोक आयोजित करे गए हे।

महोत्सव के औपचारिक शुभारंभ के बाद कबडडी प्रतियोगिता के शुभारंभ अतिथि मन कोति ले करे गीस। कबड्डी के पहिली मैच लोहण्डीगुड़ा अऊ जावंगा, दंतेवाड़ा के बीच खेले गीस। ए महोत्सव म 5 मार्च तक भिनसरहा ले कबडडी, व्हालीबाल, रस्सी खीच अऊ नौका दौड़ के प्रतियोगिता होही। संझा रंगारंग सांस्कृतिक कार्यक्रम आयोजित करे जाही। ए पइत बस्तर संभाग के सबो जिला मन के लोक कलाकार मन ल प्रस्तुति के अवसर देहे गए हे।

एखर अलावा आन्ध्रप्रदेश अऊ ओड़ीसा के कलाकार घलोक सांस्कृतिक कार्यक्रम प्रस्तुत करहीं। बस्तर संभाग के कई ठन लोक संस्कृति के प्रदर्शन बर सबो सातों जिला मन के लोक कलाकार मन के मध्य सांस्कृतिक कार्यक्रम के स्पर्द्धा रखे गए हे। ए सांस्कृतिक कार्यक्रम मन म सामिल कलाकार मन के पंजीयन नागपुर स्थित दक्षिण मध्य सांस्कृतिक केन्द्र म करे जाही, जेखर माध्यम ले ए कलाकार मन ल देश विदेश के कई ठन स्थान मन म अपन कला के प्रदर्शन के अवसर मिलही।

एखरे संगेच ए कलाकार मन ल पुरस्कार के रुप म बड़का नगद राशि घलोक देहे जाही। बस्तर संभाग के ए कलाकार मन के संगेच कई ठन खेलकूद प्रतियोगिता बर ए पइत पहिली पुरस्कार के रुप म 41 हजार रुपिया, दूसर पुरस्कार के रुप म 31 हजार रुपिया अऊ तीसर पुरस्कार के रुप म 21 हजार रुपिया प्रदान करे जाही।