Jagdalpur: बस्तर जिला म 8 दिन बर काली ले लगही लाकडाउन, कलेक्टर ह जारी करिन आदेश

जय जोहार…. (Jagdalpur) बस्तर जिला म काली 15 अप्रैल ले 22 अप्रैल तक लॉकडाउन लगइया हे। ए संबंध म कलेक्टर रजत बंसल ह आदेश जारी कर दे हे। जारी आदेश के अनुसार बस्तर जिला के पूरा क्षेत्र ल 15 अप्रैल शाम 6 बजे ले 22 अप्रैल रात 12 बजे तक कंटेनमेंट जोन घोसित करे गे हे।

ए दौरान बस्तर जिला के सबो सीमा ह सील रही। ए अवधि म सिरिफ मेडिकल दुकान ल तय बेरा म खोले के अनुमति होही। मेडिकल दुकान संचालक ह मरीज मन बर दवा के होम डिलीवरी ल प्राथमिकता देही। (Jagdalpur) दुग्ध पार्लर-दुग्ध वितरण अउ न्यूज पेपर हाकर के तरफ ले समाचार पत्र के वितरण के बेरा बिहनिया 6 बजे ले 8 बजे तक अउ संझा 5 बजे ले 6.30 बजे तक होही। ए अवधि म दुग्ध व्यवसाय बर कोनो दुकान-पार्लर नई खोले जाही।

दुकान अउ पार्लर के सामने ए बेरा म सिरिफ दुग्ध विक्रय के अनुमति होही। पेट शॉप अउ एक्वेरियम ल सिरिफ पशु ल चारा दे बर बिहनिया 6 बजे ले 8 बजे तक अउ संजा 5 बजे ले 6.30 बजे तक दुकान खोले के अनुमति होही। (Jagdalpur) ए अवधि के दौरान पूरा जिला के अंतर्गत संचालित शराब दुकान बन्द रही। सबो धार्मिक, सांस्कृतिक अउ पर्यटन स्थल ह बन्द रही।