छत्तीसगढ़ी व्यंजन ले महक गे युवा महोत्सव , नारायणपुर अऊ कबीरधाम रिहिस प्रथम

जय जोहार रायपुर.. राज्य स्तरीय युवा महोत्सव म साइंस कॉलेज परिसर आज पारंपरिक छत्तीसगढ़ी व्यंजन के खुशबू ले  महक उठीस इन्हा अयोजित फूड फेस्टिवल म छत्तीसगढ़ी व्यंजन के विविधता अऊ ओखर स्वाद के खजाना दिखाई दिस। प्रदेश के विभिन्न जिला से आए प्रतिभागी मन स्थानीय पारंपरिक व्यंजन बनाईस ।

एमा फरा, चीला, चौसेला, अईरसा, हिरवां पूरी, दूध फरा, दहरोरी, धुसका, जीमीकंद की सब्जी अऊ ठेठरी, खुरमी व्यंजन खास रिहिस । एखर संग बस्तर के चापड़ा चटनी, अमारी फूल के चटनी-शर्बत अऊ ईमली ले बने लाटा ले लोगन के मुंह म पानी आ गिस । प्रतियोगिता म 15 से 40 वर्ष आयु वर्ग म 21 अऊ  40 वर्ष से अधिक आयु वर्ग म 8 प्रतिभागी शामिल होईस ।

प्रतियोगिता म 15 से 40 वर्ष आयु वर्ग म नारायणपुर जिला प्रथम, सूरजपुर जिला द्वितीय अऊ जांजगीर-चांपा जिला तृतीय रिहिस अऊ 40 वर्ष से अधिक आयु वर्ग म कबीरधाम जिला के प्रतिभागी  मन प्रथम स्थान, धमतरी जिला द्वितीय स्थान अऊ नारायणपुर जिला के प्रतिभागी मन ल तृतीय स्थान मिलिस । प्रतियोगिता के निर्णायक मंडल के सदस्य रायपुर के श्रीमती नेहा सोनी, सुश्री नम्रता चन्द्रांकर अऊ श्रीमती सरिता शर्मा रिहिन .

निर्णायक मण्डल के सदस्य मन बताइस कि प्रतिभागी मन ल व्यंजन बनाय बर 45 मिनट के समय दे गे रिहिस जेमा  कुल 100 अंक रिहिस । व्यंजन म अंक के आकलन छत्तीसगढ़ी व्यंजन विषय के अनुरूप प्रस्तुति, सज्जा, व्यंजन के  संक्षिप्त प्रस्तुतिकरण, स्वाद अऊ  व्यंजन बनाय के दक्षता अऊ सम्पूर्ण प्रभाव के आधार म करे गिस .