मनखे मन ला रोजगार खोजइया के बदला रोजगार देवइया बनाव – केन्द्रीय मंत्री श्री ओंराव

केंद्रीय जनजातीय मामला के मंत्री जुएल ओंराव ह (NSTFDC) ला जनजातीय उद्यमिता बर एक ‘उत्प्रेरक’ बताइन

रायपुर. केंद्रीय जनजातीय मामला के मंत्री जुएल ओंराव ह जम्मो देस मा अनुसूचित जनजाति समाज ला मजबूत बनाए मा राष्ट्रीय अनुसूचित जनजाति वित्त एवं विकास निगम (NSTFDC) के बड़े भूमिका के बारे मा बताइन। ओमन कहिन कि (NSTFDC) के सोच सिरिफ़ नौकरी देववाय तक सीमित नई हे, बल्कि ओखर लक्ष्य हे कि व्यापार-व्यवसाय ला बढ़ावा देना अउ मनखे मन ला रोजगार खोजइया के बदला रोजगार देवइया बनाए मा मदद करना आय। नई दिल्ली मा 10 अप्रैल 2026 के दिन (NSTFDC) के 25वें स्थापना दिवस कार्यक्रम ला संबोधित करत श्री ओंराव ह ये निगम ला जनजातीय उद्यमिता बर एक उत्प्रेरक बताइन।

केंद्रीय जनजाति मंत्री जुएल ओंराव ह छत्तीसगढ़ ले चुने गे हितग्राही—जिला बेमेतरा के किशन ध्रुव, ग्राम कुआं (किराना बिजनस) अउ धनराज ठाकुर, ग्राम गातापार (फोटो स्टूडियो बिजनस) के संग-संग छत्तीसगढ़ राज्य अंत्यावसायी सहकारी वित्त एवं विकास निगम के प्रतिनिधि (कार्यपालन अधिकारी) प्रवीण कुमार लाटा के स्वागत करिन। ओमन (NSTFDC) लोन योजना के तहत अपन-अपन व्यापार चलाए बर ओखर मेहनत के सराहना करिन। मंत्री जी ह हितग्राही मन ला प्रशस्ति पत्र अउ स्मृति चिन्ह देके सम्मानित घलो करिन।’

ये काम ह मनखे मन के हित मा हे, ये बात ऊपर जोर देवत श्री ओंराव ह निगम के ओ मुख्य उदेस्य ला बताइन जेखर तहत बिना कउनो गारंटी (collateral-free) के पइसा के मदद दे जाथे, जेखर से जनजाति समाज के हितग्राही मन तक ये सुविधा ह अउ जादा ले जादा पहुँच सकय। मीडिया ले गोठ-बात करत श्री ओंराव ह कहिन कि निगम ह हितग्राही मन ला 16 लाख ले जादा लोन (ऋण) बांट चुके हे अउ अब तक कुल मिलाके 4,000 करोड़ रूपया ले जादा के राशि बांटे जा चुके हे।

भारत सरकार के जनजातीय कार्य मंत्रालय के अधीन आने वाला राष्ट्रीय अनुसूचित जनजाति वित्त एवं विकास निगम (NSTFDC) ह नई दिल्ली के विश्व युवा केंद्र मा अपन 25वां स्थापना दिवस मनाइस। ये कार्यक्रम मा जनजातीय कार्य मंत्रालय के सचिव रंजना चोपड़ा, संयुक्त सचिव अनंत प्रकाश पांडे अउ (NSTFDC) के अध्यक्ष एवं प्रबंध निदेशक (CMD) टी. रौमुआन पाइते, (NSTFDC) के प्रबंधक अउ मध्य क्षेत्र के प्रमुख विकास रंजन के संग-संग निगम के पुराना CMD अउ जम्मो देस के राज चैनलिंग एजेंसी मन के प्रतिनिधि मन उपस्थित रीहिन।