घायल मन के नीक इलाज बर कलेक्टर–एसपी डटे हें

• उमन के परिवार ले संपर्क अउ मदद पहुँचाय के काम जारी
• स्वास्थ्य मंत्री घलो लगातार जिला प्रशासन के संपर्क मा हें

रायपुर. सक्ति जिला के सिंघीतराई मा स्थित वेदांता प्लांट मा बॉयलर फटे ले होय बड़े हादसा के बाद जिला प्रशासन ह तुरंत हरकत मा आ गे हे। मुख्यमंत्री विष्णु देव साय ह घटना अउ घायल मन के इलाज ला लेके कलेक्टर अमृत विकास टोपनो अउ पुलिस अधीक्षक प्रफुल्ल ठाकुर ले लगातार गोठ-बात करत हें अउ जरूरी निर्देश देवत हें। स्वास्थ्य मंत्री श्यामबिहारी जायसवाल घलो लगातार हालत के जायजा लेवत हें अउ कलेक्टर के संग तालमेल बनाय हें।

घटना के जानकारी मिलत ही कलेक्टर, एसपी अउ प्रशासन के टीम ह तुरंत घटना के जगह मा पहुँचिस अउ बचाव के काम (रेस्क्यू) सुरू करिस। घायल मन ला पहिली प्राथमिकता देवत रायगढ़ के फोर्टीस हॉस्पिटल, मेडिकल कॉलेज अउ अपेक्स अस्पताल मा भरती कराय गे। जऊन मन के हालत जादा खराब रीहीस, ओमन ला नीक इलाज बर रायपुर के कालड़ा अस्पताल रेफर करे गे हे। प्रशासन कोती ले घटना के जगह मा घेरा (बैरिकेड) लगाके सुरक्षा के तगड़ा इंतजाम करे गे हे।

कलेक्टर श्री टोपनो ह बताइन कि मुख्यमंत्री के निर्देश मा घायल मन ला सबले बढ़िया इलाज देववाय बर जम्मो कोसिस करे जात हे। उमन के चिनहारी करके ओखर घर वाले मन ले संपर्क करे जात हे। पोस्टमार्टम के बाद पार्थिव शरीर ला ओखर गांव तक एम्बुलेंस ले पहुँचाए अउ तुरंत सहायता राशि देवाय के व्यवस्था पक्का करे गे हे।

हादसा मा घायल या प्रभावित मजदूर मन ला जब तक ओमन पूरा तरीका ले ठीक नई हो जाहीं, तब तक बिना काम मा आय (उपस्थिति के) पूरा तनखा (वेतन) देय बर सहमति बन गे हे। कलेक्टर ह बताइन कि मुआवजा के पइसा ला लेके देर रात तक गोठ-बात होइस अउ सहमति बन गे हे। घटना के मजिस्ट्रियल जांच के आदेश दे दे गे हे अउ जांच टीम ह जल्दी ही घटना के जगह मा जाके जांच-परख करही। बचाव के काम मा एसडीआरएफ (SDRF) के टीम घलो डटे हे।

मुख्यमंत्री कोती ले उमन के परिवार ला 5 लाख रूपया अउ घायल मन ला 50-50 हजार रूपया के मदद देय के घोषणा करे गे हे। इही कस, प्रधानमंत्री कोती ले घलो उमरे मन के परिवार बर 2 लाख रूपया अउ घायल मन बर 50 हजार रूपया के सहायता राशि मंजूर करे गे हे।

पुलिस अधीक्षक प्रफुल्ल ठाकुर ह जानकारी दीन कि ये हादसा मा कुल 36 मजदूर प्रभावित होय हें, जेमा ले 17 झन के मउत हो गे हे अउ 19 झन घायल हें, जेखर इलाज चलत हे।कंपनी प्रबंधन ह कहि हे कि ओमन प्रभावित परिवार मन के संग मजबूती ले खड़े हें। उमरे मजदूर मन के परिवार ला 35 लाख रूपया के आर्थिक मदद अउ रोजगार मा सहयोग, अउ घायल मन ला 15 लाख रूपया के सहायता राशि देय जाही। घायल मन ला पूरा स्वस्थ होवत ले तनखा मिलत रही अउ ओमन बर परामर्श (काउंसलिंग) के सुविधा घलो देय जाही।

ये हादसा मा जऊन मनखे मन के मउत होय हे, ओमा छत्तीसगढ़ के 5, बिहार के 2, झारखंड के 3, पश्चिम बंगाल के 5 अउ उत्तर प्रदेश के 2 मजदूर भाई मन सामिल हें। उमन के नाम हे

रितेश कुमार (सोनबर्शा, भागलपुर, बिहार),
अमृत लाल पटेल (मंझापारा, डभरा, सक्ती, छत्तीसगढ़),
थंडा राम लहरे (मालखरौदा, सक्ती, छत्तीसगढ़),
तरुण कुमार ओझा (सिंदरी, धनबाद, झारखंड),
आकिब खान (दरभंगा, बिहार),
सुसांत जना (पूर्व मेदिनीपुर, पश्चिम बंगाल),
अब्दुल करीम (झारखंड),
उधव सिंह यादव (रायगढ़, छत्तीसगढ़),
शेख सैफुद्दीन (हल्दिया, पश्चिम बंगाल),
पप्पू कुमार (सोनभद्र, उत्तर प्रदेश),
अशोक परहिया (पलामू, झारखंड),
मनस गिरी (पूर्व मेदिनीपुर, पश्चिम बंगाल),
बृजेश कुमार (सोनभद्र, उत्तर प्रदेश),
रामेश्वर महिलांगे (जांजगीर–चांपा, छत्तीसगढ़),
कार्तिक महतो (पुरुलिया, पश्चिम बंगाल),
नदीम अंसारी (सक्ती, छत्तीसगढ़),
शिबनाथ मुर्मू (पुरुलिया, पश्चिम बंगाल)।