जगदलपुर. तेलंगाना ले तीन दिन पहिली अपहरण करे गे टीआरएस नेता अउ पूर्व विधायक श्रीनिवास राव के नक्सली मन हत्या कर दिन। उंकर शव शुक्रवार दोपहर तेलंगाना बॉर्डर म किस्टराम के एरमपाडू अउ पुट्टापाडू के बीच सड़क किनारे पड़े मिलिस।
भद्रादरी कोत्तागुडूम जिला के एसपी सुनील दत्त हा किहिन कि श्रीनिवास किसान अउ ग्रामीण मन बर अच्छा काम करत रिहिन हें। उंकर हत्यारा मन ला छोड़े नई जाय।
नक्सली मन पूर्व विधायक के शव के पास कुछ पर्चा फेंकें रिहिन। जेमा आरोप लगाए हें कि टीआरएस नेता राव हा तेलंगाना इंटेलीजेंस बर लोगन मन ला मुखबिर बनाए के काम करत रिहिस हे। राव हा आदिवासी मन के 70 एकड़ जमीन म कब्जा कर ले रिहिस। आम लोगन ला नक्सली मामला म फंसावत रिहिस।
रिपोर्ट के मुताबिक- नक्सली मन टीआरएस नेता श्रीनिवास राव के अपहरण तेलंगाना के भद्रादी कोठागुड़म जिला म उंकर गृहग्राम कोथुर ले सोमवार रात के करे रिहिन। राव के पत्नी दुर्गा राव हा बताईन कि एक दर्जन ले ज्यादा आदमी मन उंकर पति ला अगवा करे बर आए रिहिन।
राव के पत्नी हा बताईन कि ओमन नक्सली मन ले राव ला छोड़े बर बहुत गुहार लगाइन, फेर ओमन पूर्व विधायक ला मारते रिहिन। तेलंगाना अउ छत्तीसगढ़ पुलिस उंकर तलाश करत हे। शुक्रवार के राव के लाश मिलने के बाद परिवार म शोक छा गे।
टीआरएस नेता के हत्या के जिम्मेदारी नक्सली मन के शबरी एरिया कमेटी के सेक्रेटरी शारदा हा ले हे। माने जाथे कि राव ला अपहरण के बाद तेलंगाना ले छत्तीसगढ़ लाए गे रिहिस। राव के आखिरी लोकेशन भी चंदा-कोट्टापदु के जंगल म मिले हे, जो छत्तीसगढ़ के जंगल से मिले हुए हे।
Other Articles
No Comment! Be the first one.