Raipur : कौशल्या महोत्सव : संस्कृति मंत्री अमरजीत भगत ह करिन घोसना, मानस मंडली के महिला ल मिलही माता कौशल्या अलंकरण

जय जोहार। अपन क्षेत्र म अच्छा काम करत मानस मंडली के महिला ल माता कौशल्या अलंकरण दे जाही । महिला ससक्तिकरण बर सासन ह ये बिसेस पहल करे हे । चंदखुरी म माता कौशल्या महोत्सव के सुभारंभ के अवसर पर ये घोसना संस्कृति मंत्री अमरजीत भगत ह करिन ।

मंत्री श्री भगत ह किहिन कि हमर संस्कृति, कला अउ साहित्य ल आगू बढ़ाए ल छत्तीसगढ़ सासन डहार ले ये भव्य आयोजन करे जावत हे । छत्तीसगढ़ सरकार डहार ले सांस्कृतिक धरोहर ल सहेजे अउ एमन ल आगू बढ़ाए के जेन काम सरलग करे जावत हे । ओखर सेती प्रदेस ल नवा पहचान देस -दुनिया म मिलत हे ।

क्लासिकल सिंगर मैथिली ठाकुर आज दिही अपन प्रस्तुति

माता कौशल्या महोत्सव के दूसरइया दिन मशहूर गायिका कविता पौडवाल अउ वाराणसी के व्योमेश शुक्ल के प्रस्तुति होही। ए कार्यक्रम ल महोत्सव के पहिली दिन होना तय रिहीस। बारिश होए के सेती ए कार्यक्रम ल आज करे के फैसला ले गेहे।

चंदखुरी म होवइया ए महोत्सव म मशहूर युवा क्लासिकल सिंगर मैथिली ठाकुर अउ देश के प्रख्यात गायक पद्मश्री कैलाश खेर घलो अपन प्रस्तुति दिही। मैथिली ठाकुर माता कौशल्या महोत्सव के दूसर दिन अपन प्रस्तुति देही। उहें कैलाश खेर महोत्सव के आखिरी दिन 24 अप्रेल के मंच म अपन प्रस्तुति दिही। पहिली दिन महोत्सव म मशहूर भजन गायक कविता पौडवाल अऊ श्रीराम के शक्ति पूजा प्रस्तुत करईया वाराणसी के व्योमेश शुक्ला के प्रस्तुति ह होवईया रिहिस फेर बारिश होए के सती कार्यक्रम ल स्थगित कर दूसर दिन करे गे हे।